IRI-ის კვლევამ აჩვენა, რომ გამოკითხული მოსახლეობის ყველაზე დიდ ნაწილს – 53%-ს, საქართველოში მთავარ პრობლემად უმუშევრობა მიაჩნია.
გამოკითხულთა 46% თვლის, რომ ყველაზე დიდ პრობლემას ქვეყანაში ცხოვრების გაზრდილი ხარჯი და მაღალი გადასახადები ქმნის. სიმწვავის მიხედვით, მესამე პრობლემად სიღარიბე სახელდება. მას მთავარ გამოწვევად მოსახლეობის 16% მიიჩნევს.
პოლიტიკური პოლარიზაცია მთავარ პრობლემად გამოკითხულთა 8%-მა დაასახელა; განათლების საკითხი – 6%-მა, ხოლო ჯანდაცვა – 4%-მა.
მცირე ბიზნესების სესხებზე ხელმისაწვდომობას პრობლემად გამოკითხულთა 3% ასახელებს.
უმუშევრობას (35%) და მაღალ ფასებს (38%) ასახელებენ მთავარ პრობლემად ქვეყნის რეგიონებშიც. მაგრამ აქ წინ არის წამოწეული ინფრასტრუქტურისა და წყალმომარაგების პრობლემები. რეგიონის მოსახლეობის 22% მთავარ პრობლემად მოუწესრიგებელ ინფრასტრუქტურას ასახელებს, ხოლო 13% – წყალმომარაგებასთან დაკავშირებულ პრობლემებს. სიღარიბეს სოფლად ასევე, 13% აძლევს ხმას.
