2023 წლის მაისისთვის უკრაინის მოსახლეობამ 29 მილიონი ადამიანი შეადგინა. აქედან მხოლოდ მესამედი მუშაობს – დაახლოებით 9,1-9,5 მილიონი მოქალაქე. სახელმწიფო მოხელეების გამოკლებით, დაახლოებით 6-7 მილიონი უკრაინელია დასაქმებული. ინფორმაციას უკრაინის მომავლის ინსტიტუტი აქვეყნებს.
2017 წლისთვის უკრაინაში 42,5 მილიონი ადამიანი ცხოვრობდა. რუსეთის მიერ ომის დაწყებამდე კი ქვეყნის მოსახლეობა 43,5 მილიონს აჭარბებდა.
22-23 მილიონ ადამიანს პენსიონერები, ბავშვები, სტუდენტები, უმუშევრები შეადგენენ.
უკრაინაში შობადობის კოეფიციენტი უკვე 1-ს ქვემოთ ჩამოვიდა. მოსახლეობის ზრდისთვის ეს მაჩვენებელი 2-ზე მეტი უნდა იყოს. რუსეთის თავდასხმის დაწყებიდან ქვეყნიდან გასული მოქალაქეებიდან, 8,6 მილიონი უკრაინაში არ დაბრუნებულა.
ინსტიტუტის მეცნიერები ამბობენ, რომ თუ არაფერი შეიცვლება, უახლოეს წლებში უკრაინაში ორჯერ მეტი პენსიონერი იქნება, ვიდრე დასაქმებული მოქალაქე. შესაბამისად, ქვეყანაში მშპ-ის შემქმნელი მოსახლეობის წილი მკვეთრად შემცირდება.
ცნობისთვის, ევროკავშირის წევრ ქვეყნებში დროებითი ბინადრობის უფლება უკრაინის 4-მა მილიონმა მიგრანტმა მიიღო, რომლებიც იქ ომის შემდეგ დარჩნენ.
