ბიზნესმენი იგორ ლევჩენკო, რომელიც სხვადასხვა ქვეყანაში IT კომპანიების ქსელს ფლობს, უკრაინაში ახალ პროექტს იწყებს, სახელწოდებით Catch the huckster – get the cash (დაიჭირე ნარკოდილერი – მიიღე ფული). პროექტი ნარკორეალიზაციის წინააღმდეგ ბრძოლას ითვალისწინებს.
პროექტის მონაწილე მიიღებს ფულად ანაზღაურებას, თუ გამოავლენს ნარკოდილერს და პოლიციას მის დაჭერაში დაეხმარება.
ანაზღაურება ამოღებული ნარკოტიკების ოდენობაზე იქნება დამოკიდებული. პრემია $200-დან იწყება და $1000-ს აღწევს.
ამისათვის საკმარისია, ნებისმიერი მსურველი მივიდეს პოლიციის უახლოეს განყოფილებაში და დაწეროს განცხადება იმ ნარკომოვაჭრეზე, რომელიც მან დაადგინა. ამის შემდეგ, მან უნდა წარადგინოს განცხადების ასლი, პოლიციის მიერ დამნაშავის დაკავების ვიდეოჩანაწერი და ამონაწერი სისხლის სამართლის საქმის დაწყების შესახებ და, როგორც ბიზნესმენი ამბობს, ფონდიდან ფულს დაუყოვნებლივ მიიღებს.
გაცილებით მეტს გადაუხდიან მას, ვინც გამოავლენს ნარკოტიკების მწარმოებელ ლაბორატორიას. დიდი ლაბორატორიების გამოაშკარავებისთვის, სადაც ათ კილოგრამზე მეტი აკრძალული ნივთიერება იქნება აღმოჩენილი, ფონდი პრემიის სახით $10 ათასს გადაიხდის. ხოლო 30 კგ და მეტი ოდენობის ნარკოტიკის ამოღების შემთხვევაში, ანაზღაურება $25 ათასი იქნება.
უკრაინელი ბიზნესმენი ირწმუნება, რომ ფულადი სახსრები ლიმიტირებული არ აქვს და მზად არის აქციაში ფული შეუზღუდავად ჩადოს.
ბიზნესმენი დარწმუნებულია, რომ პროექტს შეუძლია, ქვეყანაში ნარკოტიკებით ვაჭრობა მინიმუმამდე შეამციროს.
„ამას ვაკეთებ ქვეყნისა და საკუთარი თავისთვის, იმ ჭირის აღმოსაფხვრელად, რაც არის ნარკოტიკების დამზადება და გავრცელება“, – აღნიშნა ლევჩენკომ.
სოციოლოგიურმა კვლევამ აჩვენა, რომ Catch the Huckster-ის კამპანიას უკრაინელების 61,8% უჭერს მხარს.
