კანადის პოლიცია იძიებს ისტორიაში ერთ-ერთ უდიდეს ძარცვას, რომელიც რამდენიმე დღის წინ ტორონტოს პირსონის აეროპორტში მოხდა.
აეროპორტიდან $14,8 მილიონის ოქრო და ძვირფასეულობა გაუჩინარდა.
როგორც კანადის პოლიციამ განაცხადა, ოქრო და სხვა ნივთები თვითმფრინავიდან კონტეინერების გადმოტვირთვის შემდეგ მოიპარეს.
„თვითმფრინავი აეროპორტში საღამოს ჩამოფრინდა. პროცედურის მიხედვით, თვითმფრინავი გადმოიტვირთა და კონტეინერები სატვირთოზე გადაიტანეს“, – განაცხადა პოლიციის წარმომადგენელმა.
ონტარიოს ოქროს მაღაროებიდან ხშირად გზავნიან ძვირფას ლითონს ქალაქის აეროპორტში, რომელიც ქვეყნის საჰაერო ტვირთების თითქმის ნახევარს ემსახურება.
პოლიციამ ვერ მიაგნო მოპარულ ტვირთს და ჯერჯერობით ოქროს ქვეყნის ტერიტორიაზე არსებობაც არ დასტურდება.
აეროპორტის ადმინისტრაციამ განაცხადა, რომ ქურდებმა შეაღწიეს საწყობის მხრიდან, რომელიც იჯარით მესამე პირზეა გაცემული.
ეს კანადის აეროპორტში ქურდობის პირველი შემთხვევა არ არის. იმავე აეროპორტიდან 1952 წლის 25 სექტემბერს $215 ათასის ოქრო მოიპარეს. ეს იყო ოქროს ყველაზე დიდი ძარცვა კანადის ისტორიაში. ნაძარცვის ფასი დღევანდელი კურსით $2,3 მილიონს აღწევს.
აეროპორტის სატვირთო ზონაში, ექვსი ხის ყუთი მოიპარეს ოქროთი, სანამ მას მონრეალში მიმავალ თვითმფრინავში ჩატვირთავდნენ. „ოქრო უბრალოდ გაქრა”, – განაცხადა ერთ-ერთმა გამომძიებელმა. საქმე დღემდე გაუხსნელია.
