2023 წლის პირველ კვარტალში სატელევიზიო და რადიომაუწყებლების ჯამური სარეკლამო შემოსავალი, წინა წლის იმავე პერიოდთან შედარებით, 12.5%-ით შემცირდა და 15.6 მილიონი ლარი შეადგინა. მონაცემებს კომუნიკაციების ეროვნული კომისია აქვეყნებს.
2023 წლის პირველ კვარტალში ტელევიზიებმა კომერციული რეკლამიდან 14.1 მილიონ ლარი მიიღეს, რაც წინა წლის იმავე პერიოდთან შედარებით, 2.2 მილიონი ლარით ნაკლებია.
ტელევიზიების სარეკლამო შემოსავლების 66.7% პირდაპირმა რეკლამამ შეადგინა, 2022 წლის პირველ კვარტალთან შედარებით კი, სპონსორობის წილი 1.2%-ით, ხოლო პროდუქტის განთავსების წილი 5.5%-ით გაიზარდა.
რაც შეეხება რადიომაუწყებლებს, მათი სარეკლამო შემოსავლები 2023 წლის პირველ კვარტალში, წინა წლის იმავე პერიოდთან შედარებით, 2.6%-ით არის გაზრდილი და 1.5 მილიონ ლარს შეადგენს, საიდანაც პირდაპირ რეკლამას 87.82%, ხოლო სპონსორობას 12.16% უკავია.
კომერციული სარეკლამო შემოსავალი კომერციულ რეკლამას, სპონსორობას, პროდუქტის განთავსებას, ტელეშოპინგსა და კომერციულ განცხადებებს მოიცავს.
2022 წლის 1-ელი მარტიდან აიკრძალა აზარტული თამაშების რეკლამა, რაც მაუწყებლების შემოსავლებზეც აისახა. 2022 წლის იმავე პერიოდში, აზარტული თამაშების სექტორიდან მიღებული სარეკლამო შემოსავალი 4.8 მილიონი ლარი იყო.
