საქართველოს გარემოს დაცვის და სოფლის მეურნეობის მინისტრის პირველი მოადგილე გელა ხანიშვილი თანამდებობას ტოვებს.
სამინისტროს პრესსამსახურის ინფორმაციით, გელა ხანიშვილმა გათავისუფლების შესახებ განცხადება უკვე დაწერა, მაგრამ მისი განაცხადი ჯერ არ დაუკმაყოფილებიათ.
გელა ხანიშვილი სოფლის მეურნეობის მინისტრის მოადგილედ 2016 წელს დაინიშნა. 2019 წლიდან კი იმავე სამინისტროში მინისტრის პირველი მოადგილის პოსტს იკავებდა.
ხანიშვილი ერთ-ერთი ყველაზე მდიდარი ჩინოვნიკია. ის სახელმწიფო თანამდებობაზე ბიზნესიდან მოვიდა. ის არის ერთ-ერთი ყველაზე დიდი ფერმერული მეურნეობის დამფუძნებელი, რომელიც მარცვლეულს აწარმოებს. ასევე, არის რამდენიმე კომერციული კომპანიის მეწილე.
გელა ხანიშვილი ფლობს მილიონიან სახლს და მიწის ნაკვეთს თბილისში, მარგიანის ქუჩაზე. აღნიშნული უძრავი ქონება მან 2019 წელს მილიონ 10 080 ლარად შეიძინა. საჯარო რეესტრის მონაცემების მიხედვით, მან ეს სახლი თიბისი ბანკის კრედიტით შეიძინა. მარგიანის ქუჩაზე მინისტრის მოადგილის ნაკვეთი 690 კვ.მეტრია, ხოლო სახლი – 537.68 კვ.მეტრი.
ამასთან, მინისტრის მოადგილეს საბანკო ანგარიშებზე ნახევარი მილიონ ლარზე მეტი ოდენობის დანაზოგი აქვს.
