საქართველოში 100 მეგავატამდე სიმძლავრის მზის ელექტროსადგური და 50 მეგავატი სიმძლავრის ქარის ელექტროსადგური აშენდება. პროექტებს საქართველოს ენერგეტიკის განვითარების ფონდი ახორციელებს.
ფონდის ხელმძღვანელის – ჯაბა ხმალაძის ინფორმაციით, თითოეული ამ პროექტისთვის $100 მილიონის ინვესტიცია იქნება საჭირო.
96 მეგავატი სიმძლავრის მზის ელექტროსადგური სამგორში აშენდება. მას არაბთა გაერთიანებული საამიროების სახელმწიფო ფონდი მასდარი (Masdar) ააშენებს, რომელიც განახლებადი ენერგიისა და მდგრადი ურბანული განვითარების მიმართულებით, მსოფლიოს 40 ქვეყანაში ოპერირებს.
ხოლო 50 მეგავატი სიმძლავრის ქარის ელექტროსადგური კასპში, სოფელ ნიგოზაში განთავსდება. ელექტროსადგურმა 232 მლნ.კვტ.სთ ელექტროენერგია უნდა გამოიმუშაოს.
ნიგოზას ქარის ელექტროსადგურს ააშენებენ კომპანია ჩალიკ ჯორჯია ვინდ (CALIK ENERJI SANAYI TICARET A.S) – 85% და საქართველოს ენერგეტიკის განვითარების ფონდი – 15%.
ჩალიკ ჯორჯია ვინდსა და საქართველოს მთავრობას შორის მემორანდუმი 2016 წლის მარტში გაფორმდა. კომპანია განახორციელებს მშენებლობას და შემდეგ ელექტროსადგურის ფლობას და ოპერირებას.
ამ ეტაპზე კომპანია ელოდება მთავრობასთან ელექტროენერგიის ტარიფის შეთანხმებას და პასუხს საქართველოს სახელმწიფო ელექტროსისტემისგან გადამცემ ქსელთან მიერთების თაობაზე.
ხმალაძის თქმით, აღნიშნული პროექტების განსახორციელებლად ფონდი ევროპის რეკონსტრუქციისა და განვითარების ბანკთან თანამშრომლობს. დანარჩენი თანხების მოძიებაზე ჩალკ ენერჯისთან ერთად მუშაობენ.
მისი თქმით, მთავრობასთან კონტრაქტის გაფორმების შემდეგ სამშენებლო ტენდერს გამოაცხადებენ.
