2022 წელს სხვაობა ცოცხლად დაბადებულთა და გარდაცვლილთა რიცხოვნობას შორის, უარყოფითი იყო და 6 799 ერთეული შეადგინა. იმის მიუხედავად, რომ გასულ წელს, 2021 წელთან შედარებით, გარდაცვლილთა რიცხოვნობა 18%-ით შემცირებულია.
ბუნებრივი მატება უარყოფითია ქვეყნის ყველა რეგიონში, გარდა თბილისის, აჭარის ავტონომიური რესპუბლიკისა და ქვემო ქართლის რეგიონისა.
თითქმის 8%-ით შემცირდა შობადობის მაჩვენებელი. 2022 წელს, საქართველოში 42 319 ბავშვი დაიბადა, მათ შორის 21 897 ბიჭი და 20 422 გოგოა. აღნიშნული მაჩვენებელი, 2021 წელთან შედარებით, 7.9%-ით ნაკლებია..
ყველაზე მეტი ბავშვი დაიბადა თბილისში (14 202 ბავშვი), ხოლო ყველაზე ცოტა – რაჭა-ლეჩხუმისა და ქვემო სვანეთის რეგიონში (246 ბავშვი).
სტატისტიკის სამსახურის ინფორმაციით, 2022 წელს საქართველოში 49 118 ადამიანის გარდაცვალება დაფიქსირდა. გარდაცვალების ყველაზე მეტი შემთხვევა იყო თბილისში (14 123), ხოლო ყველაზე ნაკლები – რაჭა-ლეჩხუმისა და ქვემო სვანეთის რეგიონში (715).
