საქსტატის მონაცემებით, 2023 წლის იანვარში საქართველოდან განხორციელებული საქონლის ექსპორტის მოცულობა (არადეკლარირებული ექსპორტის გარეშე), გასული წლის შესაბამისი პერიოდის მაჩვენებელთან შედარებით, 38.5%-ითაა გაზრდილი და $459.0 მილიონი შეადგინა. ადგილობრივი ექსპორტი (ექსპორტი რეექსპორტის გარეშე), მთლიანი ექსპორტის 56.4%-ს შეადგენს – წინა წლის შესაბამის პერიოდთან შედარებით 11.8%-ითაა გაზარდილი და $258.8 მილიონს უტოლდება.
რაც შეეხება ქვეყნებს, რუსეთი საქართველოს ყველაზე მსხვილი საექსპორტო პარტნიორია, რომლის წილი 2023 წლის იანვარში 29,7%-ია ($76.7 მლნ.). 2023 წლის იანვარში ათი უმსხვილესი ქვეყნის წილმა საქართველოს მთლიან ადგილობრივ ექსპორტში 86.2% შეადგინა.
2023 წლის იანვარში ადგილობრივი ექსპორტის ათეულში პირველ ადგილზე სპილენძის მადნები და კონცენტრატებია $68.1 მილიონით (მთლიანი ადგილობრივი ექსპორტის 26.3%). მეორე ადგილზეა ფეროშენადნობები $50.8 მილიონით (მთლიანი ადგილობრივი ექსპორტის 19.6%), ხოლო მესამე ადგილზე აზოტოვანი სასუქებია $20.8 მილიონით (მთლიანი ადგილობრივი ექსპორტის 8.0%).
