საქართველოს მოსახლეობა მიგრანტების ხარჯზე გაიზარდა – რა ცვლილებები აჩვენა სტატისტიკამ

სტატისტიკის სამსახურის მონაცემებით, გასულ წელს საქართველოს მოსახლეობა 1.3%-ით გაიზარდა და 2023 წლის 1 იანვრის მდგომარეობით, 3.74 მილიონი კაცი შეადგინა.

მოსახლეობის რაოდენობის ზრდა 2022 წელს გაზრდილმა მიგრაციულმა ტალღამ განაპირობა. გასულ წელს ქვეყანაში უარყოფითი ბუნებრივი მატება (-6 799) დაფიქსირდა, ხოლო მიგრაციული სალდო დადებითია – საქართველოში იმიგრანტებსა და ემიგრანტებს შორის სხვაობამ 54 509 შეადგინა.

2023 წლის 1-ელი იანვრის მდგომარეობით, საქართველოს მოსახლეობის 60.4% ცხოვრობს საქალაქო დასახლებებში. ამასთან, თბილისის მოსახლეობა მთლიანი მოსახლეობის თითქმის მესამედს შეადგენს.

მოსახლეობის ასაკობრივ-სქესობრივი შემადგენლობა 

0-14 წლის მოსახლეობის წილი მთელ მოსახლეობაში 20.7%-ს შეადგენს, შრომისუნარიან ასაკში მყოფი მოსახლეობის წილი (15-64 წლის ასაკობრივი ჯგუფი) − 63.8 %-ს, ხოლო 65 წლის და უფროსი ასაკის მოსახლეობის წილი − 15.6 %-ს.

კაცების რიცხოვნობამ 1.8 მილიონი შეადგინა, ხოლო ქალების რიცხოვნობამ – 1.9 მილიონი. ამასთან, საქართველოს მოსახლეობის 48% კაცი, ხოლო 52% – ქალია. სქესთა რაოდენობრივი თანაფარდობის მაჩვენებელი 92-ს შეადგენს, რაც იმას ნიშნავს, რომ ყოველ 100 ქალზე 92 კაცი მოდის.

აღსანიშნავია, რომ 35 წლამდე ასაკში კაცების რიცხოვნობა აღემატება ქალების რიცხოვნობას, ხოლო 35 წლის ასაკიდან სახეზე გვაქვს საპირისპირო სურათი, რაც გამოწვეულია კაცებთან შედარებით ქალების უფრო მაღალი სიცოცხლის მოსალოდნელი ხანგრძლივობით.

სიცოცხლის ხანგრძლივობა 

წინა წელთან შედარებით, 2022 წელს სიცოცხლის მოსალოდნელი ხანგრძლივობა 2.3 ერთეულით გაიზარდა და 73.7 წელი შეადგინა. სიცოცხლის ხანგრძლივობა კაცებისათვის 69.4 წელი, ხოლო ქალებისათვის – 78.1 წელია.

მიგრაცია 

2022 წელს ემიგრანტების რიცხოვნობამ 125 269 კაცი შეადგინა, რაც წინა წელთან შედარებით, 25.3%-ით მეტია, ხოლო

იმიგრანტების რიცხოვნობა 142.9%-ით გაიზარდა და 179 778 კაცი შეადგინა. იმიგრანტებს შორის 54 405 საქართველოს, ხოლო 62 304 რუსეთის მოქალაქე იყო. შემოსული რუსეთის მოქალაქეებიდან 6 ათასამდე პირმა წლის ბოლომდე საქართველო დატოვა.

იმიგრანტთა შორის უკრაინის 20 716 მოქალაქე იყო. მათგან 2 ათასმა ქვეყანა დატოვა.

შარშან ბელორუსის 13 361 მოქალაქე შემოვიდა და ქვეყანა 852-მა დატოვა.

იმიგრანტთა შორის არიან ინდოეთისა და თურქეთის მოქალაქეები, რომელთა უმრავლესობა ქვეყნიდან მალევე გადის.

იმიგრანტების სტატისტიკა მოქალაქეობის მიხედვით:

• რუსეთი – 62,304 ადამიანი;
• საქართველო – 54,405 ადამიანი;
• უკრაინა – 20,716 ადამიანი;
• ბელარუსი – 13,361 ადამიანი;
• ინდოეთი – 3,948 ადამიანი.

ამავე პერიოდში, იმიგრანტების 84.3% და ემიგრანტების 86.7%, შრომისუნარიან ასაკში მყოფ მოსახლეობას (15-64 წლის ასაკობრივი ჯგუფი) წარმოადგენენ.

2022 წელს, იმიგრანტების 30.3%-ს, ხოლო ემიგრანტების 80.5 %-ს საქართველოს მოქალაქეები წარმოადგენენ.