საქართველომ ხმა არ მისცა ევროპის საბჭოს საპარლამენტო ასამბლეის გადაწყვეტილებას, უკრაინელი ბავშვების გატაცებისა და გენოციდის შესახებ. ამის შესახებ უკრაინული მედია წერს.
ასამბლეამ გენოციდად აღიარა უკრაინელი ბავშვების დეპორტაცია და იძულებითი გადაყვანა რუსეთის ფედერაციის ტერიტორიაზე. შესაბამისი რეზოლუცია ხუთშაბათს პლენარულ სხდომაზე მიიღეს.
კენჭისყრის შედეგების ოფიციალური მონაცემები აჩვენებს, რომ რეზოლუციის 15 748 მხარდამჭერს შორის საქართველოს დელეგაციის წევრები არ არიან.
ევროპის საბჭოს საპარლამენტო ასამბლეაში უკრაინის დელეგაციის წევრმა, დეპუტატმა ოლექსი გონჩარენკომ აღნიშნა, რომ დარბაზში ქართული ოპოზიციის წარმომადგენლები არ იმყოფებოდნენ.
„მმართველმა პარტიამ „ქართულმა ოცნებამ“ (მე დავინახე მისი ხელმძღვანელი დარბაზში) პროცესის საბოტაჟი მოახდინა. საბედნიეროდ, მათი ძალისხმევა ჩვენ წინააღმდეგ საკმარისი არ აღმოჩნდა“, – წერს ის.
დეპუტატის თქმით, ეს იმის მტკიცებულებაა, რომ საქართველოს მმართველი პარტია „კრემლის კონტროლს ექვემდებარება“, თუმცა, უკრაინას ქართველი ხალხის მხარდაჭერაში ეჭვი არ ეპარება.
რეზოლუციაში აღნიშნულია, რომ დონეცკისა და ლუგანსკის რეგიონების დროებით ოკუპირებული ტერიტორიებიდან უკრაინელების რუსეთის ფედერაციაში უკანონო გაყვანა ჯერ კიდევ რუსეთის შეჭრამდე დაიწყო. ისინი გაიყვანეს ბავშვთა სახლებიდან და შეზღუდული შესაძლებლობის მქონე ბავშვების სპეციალიზებული დაწესებულებებიდან.
ევროსაბჭოს საპარლამენტო ასამბლეამ მოუწოდა საერთაშორისო სისხლის სამართლის სასამართლოს, განიხილოს ამ დანაშაულისთვის სისხლისსამართლებრივი დევნის შესაძლებლობა.
