Heritage Foundation-ის 2023 წლის ეკონომიკური თავისუფლების ინდექსში საქართველო 9 ადგილით, 26-დან 35-ე ადგილზე ჩამოქვეითდა. შედეგად, ქვეყანამ „მეტწილად თავისუფალი“ ქვეყნების ჯგუფიდან „ზომიერად თავისუფალი“ ქვეყნების კატეგორიაში გადაინაცვლა.
ეკონომიკური თავისუფლების რეიტინგში დაქვეითება ქვეყანაში სასამართლოს ეფექტურობის, ბიზნესის თავისუფლების, ვაჭრობის თავისუფლებისა და საკუთრების უფლების ნაწილში მდგომარეობის გაუარესებამ გამოიწვია.
12 კატეგორიიდან გაუმჯობესება მხოლოდ შრომის თავისუფლებისა და ფინანსური თავისუფლების ნაწილში შეიმჩნევა. სარეიტინგო კომპანიამ ჩათვალა, რომ ინვესტიციის თავისუფლებისა და საგადასახადო ტვირთის თვალსაზრისით, ცვლილება არ მომხდარა.
საქართველოს ეკონომიკური თავისუფლების ქულა 68,7-ია. ამ მაჩვენებლით საქართველო ევროპის 44 ქვეყანას შორის 21-ე ადგილზეა, გასულ წელს მე-18 ადგილს იკავებდა.
რეგრესის მიუხედავად, საქართველო რეგიონის ქვეყნებს მაინც უსწრებს: რუსეთი 125-ე ადგილზეა 53.8 ქულით, თურქეთი 104-ე ადგილზეა 56.9 ქულით, აზერბაიჯანს 61.4 ქულით 75-ე ადგილი უკავია, ხოლო სომხეთი 50-ე ადგილზეა 65.1 ქულით.
პირველ ადგილზეა სინგაპური. სიის სათავეში არიან შვეიცარია, ირლანდია და ტაივანი. ეს ქვეყნები სრულად თავისუფალი ქვეყნების ჯგუფში შედიან.
