საქართველოს საპენსიო სააგენტომ მარტის თვის ფინანსური ანგარიში გამოაქვეყნა. 2023 წლის მარტის მდგომარეობით, საპენსიო ფონდში 3.23 მილიარდი ლარია ჩარიცხული, რაც 1.2 მილიონი ადამიანის საპენსიო დაზოგია.
ამ თანხიდან, სააგენტოს მონაცემებით, 492 მილიონი ლარი საინვესტიციო საქმიანობის შედეგად მიღებული წმინდა ამონაგებია. ხოლო მოქალაქეების, დამსაქმებლებისა და სახელმწიფოს 2-2-2%-იანი გადახდილი თანხების ჯამი 2.74 მილიარდი ლარს შეადგენს.
საპენსიო სააგენტო ირწმუნება, რომ თანხების დაბანდებით მიღებული სარგებელი ინფლაციის მაჩვენებელზე მეტია. კერძოდ, 2019 წლის შემდეგ, ინფლაციამ 37.43% შეადგინა. რეალური ამონაგები 4.28%-ით უფრო მაღალია.
სააგენტოს საპენსიო დანაზოგების 60% ქართული ბანკების მიერ გამოშვებულ სადეპოზიტო სერტიფიკატებში აქვს ჩადებული. 16% სახელმწიფო სახაზინო ობლიგაციებშია განთავსებული, 12% საერთაშორისო კომპანიების აქციებში, 5% უცხოურ სახელმწიფო ფასიან ქაღალდებში, 4.5% კი ბანკების სარგებლიან ანგარიშებზე დევს. მცირე ნაწილი კი ახლახანს თიბისი ლიზინგის ობლიგაციებში ჩაიდო.
