დასაქმებულ პირს, რომელიც დატოვებს საპენსიო სისტემას, შეუძლია, ნებისმიერ დროს ისევ გაწევრიანდეს სქემაში, მაგრამ მისი ხელახლა დატოვებას უფლება აღარ ექნება.
საპენსიო სქემიდან გასვლისა და მასში დაბრუნების განახლებული პირობები დღეიდან ამოქმედდა. საპენსიო სააგენტოს დირექტორის – გიორგი დანელიას შესაბამისი ბრძანება, რომელიც საკანონმდებლო მაცნეზე გამოქვეყნდა, ასევე შეეხება საპენსიო შენატანებისა და მისი დაბრუნების წესებს.
ცვლილებების მიხედვით, თუ პირი ნებაყოფლობით დატოვებს საპენსიო სისტემას, მასში დაბრუნების სურვილის შემთხვევაში, შეუძლია, შესაბამისი განცხადებით მიმართოს საპენსიო სააგენტოს დირექტორს. რაც შეეხება საპენსიო სისტემიდან გასვლის წესებს, სქემის მონაწილეს შეეძლო ჯანდაცვისა და სოციალური დაცვის სამინისტროსთვისაც მიემართა, თუმცა, ახალი დადგენილებით, მოქალაქეებმა განცხადებით უშუალოდ საპენსიო სააგენტოს უნდა მიმართონ.
სახელმწიფო საპენსიო სისტემაში ამჟამად 1.3 მილიონი მოქალაქე არის გაწევრიანებული. მათი მთლიანი დანაზოგი 3.1 მილიარდ ლარს შეადგენს.
