მოთხოვნის ზრდის შედეგად, 2022 წელს სამშენებლო მასალების ბაზარი (რომელიც მოიცავს არმატურისა და ფოლადის სხვა მასალების, ცემენტის, ბეტონის, ინერტული მასალის და საკედლე ბლოკის წარმოებასა და იმპორტს) აშშ დოლარში 30%-ით, ხოლო ლარში 18%-ით გაიზარდა 2021 წელთან შედარებით (ექსპორტის გამოკლებით). სამშენებლო მასალების ბაზრის კვლევა TBC Capital-მა ჩაატარა.
2022 წლის გაზაფხულზე, რუსეთ-უკრაინის ომის ფონზე, ფასები კიდევ უფრო სწრაფად გაიზარდა. უკრაინაში საწარმოო ინფრასტრუქტურის ნაწილობრივ განადგურებამ, საომარი ვითარების გამო საწარმოო პროცესის გაჩერებამ და შემდეგ რუსეთზე დაწესებულმა ეკონომიკურმა სანქციებმა მსოფლიო ბაზარზე გამოიწვიეს სასურსათო პროდუქციის, ძირითადი ლითონებისა და ენერგომატარებლების ფასების მკვეთრი ზრდა.
კვლევამ აჩვენა, რომ აღნიშნული ფაქტორების შედეგად, საქართველოში სამშენებლო მასალების ფასები (ლარში) 2021 წელს 23%-ით, ხოლო 2022 წელს კი დამატებით 14%-ით გაიზარდა (აშშ დოლარში ზრდა შესაბამისად იყო 19% და 26%). თუმცა, 2022 წლის მეორე ნახევრიდან ჩინეთში ეკონომიკის ზრდის შენელების, ევროკავშირში და აშშ-ში ეკონომიკური რეცესიის მოლოდინისა და გაზრდილი საპროცენტო განაკვეთების ფონზე სასაქონლო ფასებმა მსოფლიო ბაზრებზე შემცირება დაიწყო.
2023 წლის თებერვლის მდგომარეობით, ფასები მხოლოდ მცირედით აღემატება ომამდელ მაჩვენებლებს. მშენებლობის პროცესის ხანგრძლივობა და დანახარჯები შემდეგ ძირითად ფაქტორებზეა დამოკიდებული: გამოყენებული მასალების ხარისხი, პროექტის არქიტექტურული ფორმები და პროექტის ადგილმდებარეობა.
2022 წელს დეველოპერული პროექტების საშუალო ხარჯი სამშენებლო ფართის 1 კვ.მზე თბილისის შემთხვევაში $546-ს აღწევს, ბათუმში კი – $502-ს.
