ერთი წლის განმავლობაში საქართველოში 13 ახალი სამაცივრე მეურნეობა მოეწყო. საქსტატის მონაცემებით, 2023 წლის I კვარტალში საქართველოში 210 ერთეული სამაცივრე მეურნეობა ფუნქციონირებდა. შარშან ანალოგიურ პერიოდში მათი რიცხვი 197-ს შეადგენდა.
აღსანიშნავია, რომ სამაცივრეების შექმნის თვალსაზრისით, 2021 წელი გაცილებით აქტიური იყო, როცა ქვეყანაში მათი რიცხვი 61-ით გაიზარდა (2021 წლის I კვარტალში საქართველოში 136 სამაცივრე მეურნეობა ფუნქციონირებდა).
რა ინახება მაცივრებში
მაცივრებში უმეტესად ინახავენ ქათმის ხორცს (გაყინულის ჩათვლით) – 48.2%, 23% ხორცი და ხორცპროდუქტებია (ნახევარფაბრიკატების ჩათვლით, ქათმის ხორცის გარდა), 13.4% – თევზეული, 11.7% – ხილი და ბოსტნეული, ხოლო დანარჩენ პროდუქციას უმნიშვნელო წილი ჰქონდა.
სულ 2013 წლის 4 თვეში მაცივრებში შენახული იყო 85.3 ათასი ტონა პროდუქცია.
შენახული პროდუქციის 21.1% საკუთარი წარმოების, 13.4% კი შემდგომი რეალიზაციის მიზნით შესყიდული, ხოლო 65.5% მომსახურების სახით შენახულ პროდუქცია შეადგენდა. ამავე პერიოდში, მომსახურების სახით მიღებულმა შემოსავალმა 8 მლნ. ლარი შეადგინა.
სამაცივრე მეურნეობების განაწილება
სამაცივრე მეურნეობების უმრავლესობა 67,6% კვლავაც შიდა ქართლის რეგიონშია განთავსებული.
თბილისში განთავსებულია მოქმედი სამაცივრე მეურნეობები 13.3%; ქვემო ქართლის რეგიონში – 4.8% აჭარაში – 4.3%, სამეგრელო-ზემო სვანეთის რეგიონში – 3.8%, იმერეთის რეგიონში – 3.3%, კახეთის რეგიონში –1.4%, მცხეთა-მთიანეთის რეგიონში –1% და სამცხე-ჯავახეთის რეგიონში – 0,5%.
ქვეყანაში სამაცივრე მეურნეობები კვლავ არასაკმარისია. დეფიციტი განსაკუთრებით იგრძნობა რეგიონებში, სადაც ფერმერებს სეზონური ხილისა და ბოსტნეულის შენახვის პრობლემა აქვთ.
