არასამთავრობო ორგანიზაცია საერთაშორისო გამჭირვალობა-საქართველოს შეფასებით, რუსეთზე ეკონომიკური დამოკიდებულება საქართველოსთვის საფრთხის შემცველია, რადგან რუსეთი ამ ბერკეტს პოლიტიკური ზეწოლისთვის იყენებს. გარდა ამისა, ომით და სანქციებით რუსეთში გამოწვეული ეკონომიკური კრიზისი, საქართველოსაც დამატებით რისკებს შეუქმნის.
ოფიციალური ციფრები აჩვენებს, რომ 2022 წელს რუსეთიდან იმპორტი 79%-ით გაიზარდა და $1.8 მლრდ-ი შეადგინა. ხოლო რუსეთის წილი იმპორტში ბოლო 16 წლის მაქსიმუმზეა-13.1%.
კვლავ მაღალია საქართველოს დამოკიდებულება რუსულ ხორბალსა და ფქვილზე. 2022 წელს ამ პროდუქტის წილი იმპორტში 97% იყო. საქართველოში მოხმარებულ ხორბლის ფქვილში 78%-მდე რუსეთზე მოდის.
საქართველოს მთლიან ექსპორტში რუსეთის წილი 14.4%-დან 11.7%-მდე შემცირებულია, რაც იმან განაპირობა, რომ რუსეთში ქართული ექსპორტი უფრო ნაკლები ტემპით გაიზარდა (6.8%), ვიდრე საქართველოს მთლიანი ექსპორტი ყველა ქვეყანასთან (32%). ტრადიციულად, რუსულ ბაზარზე მაღალი დამოკიდებულებით ქართული ღვინის ექსპორტი გამოირჩევა. 2022 წელს ღვინის ექსპორტი 23%-ით გაიზარდა და $161 მლნ შეადგინა. რუსეთის ბაზარს საქართველოს ღვინის ექსპორტში 64% უჭირავს, რაც 2013 წლიდან, ქართული ღვინის რუსულ ბაზარზე დაბრუნების შემდეგ, ყველაზე მაღალი მაჩვენებელია.
