ეროვნული ბანკის მიერ ჩატარებული უძრავი ქონების ბაზრის კვლევა აჩვენებს, რომ რუსეთის მოქალაქეების მიერ საქართველოში უძრავი ქონების შესყიდვები შარშან 4-ჯერ გაიზარდა. ისინი საცხოვრებლად უმეტესად დედაქალაქსა და ბათუმს ირჩევენ. თბილისში უძრავი ქონების შესყიდვებში რუსეთის მოქალაქეების წილმა რეკორდულ 5%-ს გასული წლის ოქტომბერში მიაღწია(იანვარში ეს მაჩვენებელი 0,9%-ს შეადგენდა). ნოემბერში მათი წილი მცირედით, 4,4%-მდე შემცირდა.
თბილისში საცხოვრებელ ფართებს უფრო მეტად რუსეთის ის მოქალაქეები ყიდულობენ, რომელთაც ქართული წარმომავლობა აქვთ, კერძოდ, „შვილი” და “ძე”-ზე დაბოლოებული გვარები აქვთ. დანარჩენი ნაწილი კი ფართებს უფრო მეტად ბათუმში ყიდულობს, სადაც რუსეთის მოქალაქეების წილი 17,6%-ია(2022 წლის ნოემბრისთვის). ეს მაჩვენებელი 2022 წლის იანვარში 5% იყო.
კვლევის ავტორები განმარტავენ, რომ რუსეთის მოქალაქეების მონაწილეობა უძრავი ქონების ტრანზაქციებში იმდენად სწრაფად არ იზრდება, რამდენადაც საქართველოს ტერიტორიაზე მყოფი რუსების რაოდენობა, ან თუნდაც რუსეთიდან მიღებული გზავნილების მოცულობა. შეიძლება ითქვას, რომ გზავნილების მცირე ნაწილი ხმარდება უძრავი ქონების შეძენას, უფრო მეტი კი სხვა ხარჯებზე მოდის (კვება, ქირა და ა.შ.)
