სტატისტიკის ეროვნული სამსახურის ინფორმაციით, მარტში შრომისუნარიანი მამაკაცის საარსებო მინიმუმი, თებერვალთან შედარებით, 40 თეთრით შემცირდა და 256 ლარი შეადგინა.
თუ ერთი წლის წინანდელ მონაცემს შევადარებთ, წელს შრომისუნარიანი მამაკაცისთვის საარსებო მინიმუმი 17.8 ლარით არის გაზრდილი.
რაც შეეხება საშუალო მომხმარებლის საარსებო მინიმუმის ოდენობას, მარტში, წინა თვესთან შედარებით, 0.40 ლარით შემცირდა და 226.7 ლარი შეადგინა.
საარსებო მინიმუმის ცვლილება ინფლაციის მაჩვენებელზეა დამოკიდებული. რადგან ოფიციალური სტატისტიკით, 2023 წლის მარტში წლიური ინფლაციის დონე 5.3%-მდე შემცირდა, ეს კლება შესაბამისად აისახა საარსებო მინიმუმის ოდენობაზეც.
საარსებო მინიმუმი გამოითვლება მინიმალური სასურსათო კალათის საფუძველზე, რომელიც შეიცავს შრომისუნარიანი ასაკის მამაკაცის ნორმალური სიცოცხლისა და შრომისუნარიანობისათვის აუცილებელი საკვების რაოდენობას, მისი შემადგენელი ელემენტების (ცილების, ცხიმების და ნახშირწყლების) და კალორიების მინიმალურ ოდენობას.
მინიმალურ სასურსათო კალათაში სულ 40 დასახელების პროდუქტი შედის. სტატისტიკის სამსახური მათ ფასს ყოველთვიურად აჯამებს და საარსებო მინიმუმის ოდენობას განსაზღვრავს.
