რუსეთმა ოქროს ექსპორტი თურქეთში, არაბეთის გაერთიანებულ საემიროებსა და ჰონკონგში გადაამისამართა.
ოქროს ექსპორტზე დაწესებული სანქციების მიუხედავად, რუსეთი ახერხებს პროდუქციის ახალ ბაზრებზე გატანას ნაკლებად ცნობილი კომპანიების დახმარებით. ამის შესახებ Bloomberg წერს.
გასულ ზაფხულს დაწესებულმა სანქციებმა პრობლემები შეუქმნა რუსეთის ოქროს მომპოვებელ ინდუსტრიას, რომელიც ყოველწლიურად დაახლოებით $20 მილიარდის ოქროს აწარმოებს.
მას შემდეგ ათობით მცირე ლოგისტიკური ფირმამ და ტრეიდერმა დაიწყო რუსული ოქროთი ვაჭრობა გლობალურ ბაზარზე.
თუ ადრე რუსული ოქრო მასიურად გადიოდა ლონდონში ისეთი წამყვანი საბანკო ინსტიტუტების საცავებში, როგორიცაა JPMorgan Chase & Co. და HSBC Holdings Plc, ახლა გადამისამართდა არაბეთის გაერთიანებულ საემიროებში, ჰონგ კონგსა და თურქეთში, რომლებსაც რუსეთის წინააღმდეგ სანქციები არ დაუწესებიათ.
ძვირფასი ლითონების გლობალურ ტრანსპორტირებაში ლიდერობენ Brink’s Co. და Loomis, რომლებმაც შეწყვიტეს რუსული ოქროს გადაზიდვები ომის დაწყების შემდეგ. მაგრამ ეს ნიშა შეავსეს სხვა კომპანიებმა, როგორიცაა VPower Finance Security (Hong Kong) Ltd, რომელიც ნაღდი ფულისა და ოქროს ტრანსპორტირებას ჩინეთის ზოგიერთი უმსხვილესი ბანკისთვის ახორციელებს.
ImportGenius-ის მონაცემების თანახმად, 2022 წლის მარტიდან აგვისტომდე, $300 მილიონზე მეტი ღირებულების რუსული ოქრო ჰონგ კონგის გავლით გაიგზავნა.
არაბეთის გაერთიანებული საემიროები რუსული ოქროს ექსპორტის მთავარ მიმართულებად იქცა: 2022 წლის მარტიდან აგვისტომდე იქ $500 მილიონის ოქროს ექსპორტი განხორციელდა.
ოქროს კიდევ ერთი მნიშვნელოვანი მიმართულება თურქეთი გახდა: გასული წლის მარტ-აგვისტოში სტამბულის აეროპორტში დაახლოებით $305 მილიონის რუსული ოქრო გადაიზიდა.
