ყველაზე დიდმა რუსულმა მარკეტფლეისმა OZON-მა თბილისში ამანათების გაცემა დაიწყო.
კომპანიის ვებსაიტზე და აპლიკაციაში გამოჩნდა ინფორმაცია იმის შესახებ, რომ უკვე შესაძლებელია თბილისში განათავსოთ შეკვეთა და ამანათი ადგილზე მიიღოთ. საქონლის ღირებულება გამოსახულია დოლარში.
კომპანიის მიერ გავრცელებულ ინფორმაციაში აღნიშნულია, რომ ამანათის მიღება მოხდება ფილიალებიდან და შესაძლებელია სახლში მიტანაც. შეკვეთის მიწოდების დრო 10 დღემდეა.
ყველაზე ცნობილი რუსული e-commerce კომპანია თავისი პლატფორმის მეშვეობით ყიდის ელექტროსაქონელს, საოჯახო ნივთებს, სათამაშოებს, წიგნებს და სხვა პროდუქციას.
ამ დროისთვის, OZON სანქცირებული რუსული კომპანიების სიაში არ არის. თუმცა, უკრაინაში რუსეთის შეჭრის შემდეგ, ევროსაბჭომ გამოაცხადა სადამსჯელო ღონისძიებების შესახებ OZON-ის მაშინდელი გენერალური დირექტორის, ალექსანდრე შულგინის წინააღმდეგ. ამის შემდეგ შულგინი თანამდებობიდან გადადგა და კომპანიის დირექტორთა საბჭოც დატოვა. 2023 წლის სექტემბერში ალექსანდრე შულგინის საქმეზე სარჩელი გაუქმდა და პირადი სანქციები მოუხსნეს.
