აპრილში გამოქვეყნებული სტატისტიკის მიხედვით, რუსეთს წელს შობადობის ყველაზე დაბალი მაჩვენებელი ექნება, რაც ბოლო 14 წლის განმავლობაში დაფიქსირებულა.
დემოგრაფები ამბობენ, რომ 2023 წელი, შობადობის თვალსაზრისით, რუსეთისთვის ყველაზე ცუდი წელია.
რუსეთში აპრილში 95 ათასი ბავშვი დაიბადა, რაც 4,7%-ით ნაკლებია 2022 წლის ანალოგიურ პერიოდთან შედარებით და 14,2%-ით ნაკლები, რაც 2021 წლის აპრილში იყო.
დემოგრაფები შობადობის კლების მიზეზად მშობიარობის ასაკის ქალთა რაოდენობის 3%-ით შემცირებით ხსნიან. აგრეთვე, მობილიზაციითა და რუსების ქვეყნიდან მასობრივი გასვლით, ასევე, მოსახლეობის შემოსავლების შემცირებით.
დემოგრაფები ელოდებიან, 2023 წელს შობადობის 8-10%-ით შემცირებას – 1,17-1,2 მილიონამდე. თუ აღნიშნული პროგნოზი გამართლდება, მაშინ მიმდინარე წელი ერთ-ერთი ყველაზე უარესი იქნება.
2022 წელს რუსეთში ემიგრაციის ორი ტალღა იყო. პირველი – უკრაინაში შეჭრის დაწყებისთანავე და მეორე – 21 სექტემბერს მობილიზაციის გამოცხადების შემდეგ.
დემოგრაფების აზრით, 2022 წელს რუსეთი სავარაუდოდ, 600-800 ათასამდე ადამიანმა დატოვა. ზოგიერთი ექსპერტი უფრო მაღალ რიცხვსაც ასახელებს. მათი გათვლებით, რუსეთიდან 1,5 მილიონამდე ადამიანი გავიდა.
