რუსეთის ფედერაცია მომავალ წელს უკრაინის წინააღმდეგ ომისთვის მშპ-ს 6%-ის დახარჯავს. აგრესორი ქვეყანა 2025 წლის ბიუჯეტში სამხედრო ხარჯების მეოთხედით გაზრდას გეგმავს. ამის შესახებ Bloomberg რუსეთის ფედერაციის ბიუჯეტის პროექტზე დაყრდნობით წერს.
მომავალ წელს რუსეთის ბიუჯეტში „თავდაცვის” ხარჯები $142 მილიარდს მიაღწევს. ეს მშპ-ს 6,2%-ს უტოლდება. Bloomberg-ის გათვლებით, რუსეთის სამხედრო ხარჯები 2026 წელს მშპ-ს 5,6%-ს, ხოლო 2027 წელს 5,1%-ს მიაღწევს.
როგორც ჩანს, რუსეთი ომის შეწყვეტას არ აპირებს. მთლიანობაში, მომავალ წელს კრემლი ბიუჯეტის დაახლოებით 40%-ს დახარჯავს ჯარსა და სხვა სამხედრო უწყებებზე. ეს მეტია, ვიდრე ერთობლივი ასიგნებები განათლების, ჯანდაცვის და სოციალური დახმარებისთვის.
ამასთან, ბიუჯეტის დოკუმენტებიდან ჩანს, რომ რუსეთის მთავრობა მომავალ წელს ბიუჯეტის დეფიციტის შემცირებას მშპ-ს 0,5%-მდე ელოდება გაზისა და ე.წ. არა ნავთობპროდუქტების ექსპორტის ზრდით.
Bloomberg ვარაუდობს, რომ ამის პარალელურად, რუსეთის ბიუჯეტის დეფიციტი შესაძლოა გაიზარდოს.
დასავლელი დამკვირვებლები აცხადებენ, რომ პუტინი კვლავ დარწმუნებულია თავის შესაძლებლობებში, მოიგოს უკრაინის წინააღმდეგ ომი. ამავდროულად, კრემლიც და თავად რუსებიც მზად არიან ნებისმიერი დანაკარგისთვის ომის გასაგრძელებლად
როგორც Forbes Ukraine წერს, რუსეთს რაკეტების წარმოება ყოველთვიურად $1,1 მილიარდი უჯდება, თვითმფრინავების – დაახლოებით $100 მილიონი. ხოლო წარმოების მთლიანი მაჩვენებელი თვეში 132-171 რაკეტაა.
რუსეთი ყველაზე მეტ ფულს – თვეში $585 მილიონს ხარჯავს X-101 ტიპის საკრუიზო რაკეტების წარმოებაზე. „კალიბრისთვის“ – $228 მილიონი იხარჯება ყოველთვიურად. რუსეთის ფედერაცია თვეში საშუალოდ ამ ტიპის 45 და 35 რაკეტას აწარმოებს.
რუსეთს ახალი ისკანდერ-K და ონიქსის რაკეტები ყოველთვიურად $38 და $13 მილიონი უჯდება. ყოველთვიურად $135 მილიონს და $60 მილიონს ხარჯავს ისკანდერ-მ-ის და „კინჟალის” ბალისტიკური რაკეტების წარმოებაზე. Forbes-ის დაზვერვის წყაროს ინფორმაციით, ყოველთვიურად დაახლოებით 45 ისკანდერს და 6-მდე „კინჟალს” უშვებენ.
მოსკოვი დაახლოებით $100 მილიონს ხარჯავს შაჰედ-136 ტიპის კამიკაძე დრონებზე და ყოველთვიურად 500-ზე მეტ ერთეულს აწარმოებს.
