რუსეთის წიაღის სააგენტო დონეცკის რეგიონში არსებული საბადოებიდან წიაღის მოპოვებაზე ლიცენზიების გაცემას გეგმავს. სააგენტომ გამოაცხადა, რომ ლიცენზიანტების გამოსავლენად აუქციონებს გამოაცხადებს.
ქვანახშირის საბადოებს უდიდესი ეკონომიკური მნიშვნელობა ჰქონდა დონეცკის რეგიონისთვის. ტერიტორიაზე დიდი მოცულობით რკინის მადანი და ქვის მარილი მოიპოვებოდა.
მათ, ვინც უკვე ფლობს ლიცენზიებს, გამოუცხადეს, რომ რუსეთი 2025 წლიდან შეწყვეტს უკრაინის კანონმდებლობით გაცემული დოკუმენტების აღიარებას და ოკუპირებულ ტერიტორიებზე წიაღით სარგებლობისთვის რუსული ლიცენზიების აღება იქნება საჭირო.
როგორც ცნობილია, მოპოვებული რესურსების დიდ ნაწილს ვაგნერის დამფუძნებელი ევგენი პროგოჟინი აკონტროლებს იმ რეგიონებში, სადაც მისი დაჯგუფება იმყოფება. Financial Times-ის ინფორმაციით, ბოლო ოთხი წლის განმავლობაში მან $250 მილიონზე მეტი შემოსავალი მიიღო ნავთობის, გაზის, ალმასის და ოქროს მოპოვებით, მათ შორის სუდანსა და სირიაში.
უკრაინის გარემოს დაცვის სამინისტროს მონაცემებით, ამ დროისთვის უკრაინაში რუსი ოკუპანტების ხელში სულ 740-მდე სასარგებლო წიაღისეულის საბადო არის მოქცეული.
