რუსეთის საგარეო საქმეთა სამინისტრომ განაცხადა, რომ გერმანელ დიპლომატებს მასობრივად აძევებს ქვეყნიდან. ეს არის პასუხი „ბერლინის მტრულ ქმედებებზე”, – განმარტავს საგარეო უწყება.
რუსეთის საგარეო საქმეთა სამინისტრომ გადაწყვეტილება გერმანიიდან რუსი დიპლომატების გაძევების საპასუხოდ მიიღო. ის ასევე აპირებს, მნიშვნელოვნად შეამციროს რუსეთში გერმანიის დიპლომატიური მისიების თანამშრომლების რიცხვიც. ამის შესახებ გერმანიის ელჩს რუსეთში ოფიციალურად შეატყობინეს. საგარეო უწყებამ მოგვიანებით დააზუსტა, რომ სადამსჯელო ღონისძიება, 20-ზე მეტ დიპლომატს შეეხება.
ხოლო გერმანული Bild წერს, რომ მოსკოვს 34 გერმანელი დიპლომატი დატოვებს. რუსეთში გერმანიის დიპლომატიურ მისიაში სულ 90-მდე დიპლომატი მუშაობს.
ასევე გავრცელდა ინფორმაცია, რომ ბერლინში დღეს დილით, ილ-96 ჩაფრინდა, რომელიც ნაშუადღევს ისევ მოსკოვში დაბრუნდა.
უცნობია, იყვნენ თუ არა რუსი დიპლომატები ამ კონკრეტულ რეისზე, მაგრამ გერმანიის ხელისუფლებამ განაცხადა, რომ ლაინერს ჰქონდა „დიპლომატიური ნებართვა“, – წერს Bild.
მარტის ბოლოს გერმანულმა მედიამ დაწერა, რომ ბერლინი აპირებდა 30-ზე მეტი რუსი დიპლომატის გაძევებას, რომლებიც ეჭვმიტანილები იყვნენ გერმანელი ინფორმატორების გადაბირებაში. მოგვიანებით, გერმანიის საგარეო საქმეთა სამინისტრომ უარყო ინფორმაცია რამდენიმე ათეული რუსი დიპლომატის გაძევების გეგმის შესახებ. ხოლო სამინისტროს სპიკერმა განაცხადა, რომ რუსი დიპლომატების გაძევება არ მომხდარა „იმ ფორმით, როგორშიც ეს იყო წარმოდგენილი პუბლიკაციაში“.
