რუსეთი თანახმაა, თურქეთს განუსაზღვრელი ვადით დააცადოს გასულ წელს მიწოდებული გაზის საფასური იმ პირობით, თუ ქვეყნის ტერიტორიაზე ბუნებრივი აირის ჰაბის აშენების უფლებას მისცემენ. ამის შესახებ თურქეთის მთავრობა და რუსეთის სახელმწიფო კორპორაცია გაზპრომი შეთანხმდნენ, – წერს Reuters.
თურქეთს რუსეთიდან იმპორტირებული ბუნებრივი აირის საფასურის გადახდის პრობლემა ფასების მკვეთრი ზრდის გამო შეექმნა. მას გაზპრომის მიმართ $97 მილიარდამდე ვალი დაუგროვდა, რაც ბოლო წლების საშუალო მაჩვენებელზე თითქმის 2-ჯერ მეტია.
ამ ვალის გასტუმრებას გაზპრომი კარგა ხანს არ მოითხოვს. სანაცვლოდ, პუტინმა სთხოვა ერდოღანს, რომ გაზპრომს გააკეთებინოს ბუნებრივი აირის ჰაბი თურქეთში, რომელმაც რუსეთისთვის დაზიანებული Nord Stream-ის მილსადენის სისტემა უნდა ჩაანაცვლოს.
რუსეთის ნავთობისა და გაზის ექსპორტი
ევროპის ბუნებრივი აირის ბაზრის დაკარგვის შემდეგ, რუსეთი იძულებული გახდა, აირის მოპოვება შეემცირებინა. 2023 წლის პირველ კვარტალში, რუსეთში გაზის მოპოვება 2022 წლის ანალოგიურ პერიოდთან შედარებით, თითქმის 10%-ით შემცირდა.
მაგრამ ნავთობთან დაკავშირებით სიტუაცია სხვაგვარადაა. იმის მიუხედავად, რომ რუსეთი სანქციების პირობებში ნავთობს პირდაპირ ევროპაში ვერ ყიდის, მან მკვეთრად გაზარდა ექსპორტი ინდოეთში და სამხრეთის სხვა ქვეყნებში. ამის გამო რუსული ნავთობის ფასი შემცირდა.
