დიდი ბრიტანეთის მიერ რუსეთის წინააღმდეგ შემოღებული სანქციების სიას 86 ფიზიკური პირი და კომპანია დაემატა, რომლებიც დაკავშირებული არიან რუსეთის ენერგეტიკულ, მეტალურგიულ, თავდაცვის, სატრანსპორტო და ფინანსურ სექტორებთან.
კერძოდ, სანქციები შეეხო Severstal-ს, AFK Sistema-ს, ოქროს მომპოვებელ კომპანია Polyus-ს, Russian Copper Company-სა და მის დამფუძნებელ იგორ ალტუშკინს, აგრეთვე, ცხრა კომპანიას, რომლებიც ასოცირებული არიან Rosatom-თან. სანქციები შეეხება Tinkoff Bank-ს, Kalashnikov Concern-ის გენერალურ დირექტორს – ვლადიმერ ლეპინს, Gazpromneft-ის დირექტორთა საბჭოს 13 წევრს და Transneft-ის დირექტორთა საბჭოს ხუთს წევრს.
G7-ის სამიტზე, რომელიც იაპონიაში იმართება, ბრიტანეთის პრემიერ-მინისტრმა რიში სუნაკმა განაცხადა, რომ მისი ქვეყანა აკრძალვას აწესებს რუსული ბრილიანტების იმპორტზე. გარდა ამისა, აიკრძალება რუსული ლითონების, მათ შორის ალუმინის, ნიკელისა და სპილენძის იმპორტი.
შეერთებულმა შტატებმა ასევე გამოაცხადა სანქციების ახალი პაკეტი. მასში 300-მდე ფიზიკური პირი, კომპანია, გემი და თვითმფრინავი შევა. გარდა ამისა, მესამე ქვეყნიდან საექსპორტო შეზღუდვები დაუწესდება 70 რუსულ კომპანიას.
