Viterra-ის და Cargill-ის შემდეგ, რუსეთის ბაზრის დატოვებას კიდევ ერთი ამერიკული ტრეიდერი – Archer Daniels Midland Company (ADM) გეგმავს. ამის შესახებ Bloomberg საკუთარ წყაროებზე დაყრდნობით წერს.
როგორც Bloomberg აღნიშნავს, ხორბლით მოვაჭრე საერთაშორისო კომპანიების გადაწყვეტილებაზე გავლენა აშშ-ის ხელისუფლებამ მოახდინა. თეთრმა სახლმა კორპორაციებს მოსკოვთან ნებისმიერი საქმიანობის შეწყვეტა მოსთხოვა.
რა კომპანიაა ADM?
ADM საკვების და სოფლის მეურნეობის პროდუქტების მსოფლიოში ერთ-ერთი უმსხვილესი მიმწოდებელია. აგრეთვე, არის სიმინდის უდიდესი გადამამუშავებელი. კომპანია აწარმოებს საკვებ ინგრედიენტებს, ცხოველთა საკვებს, სამრეწველო და ენერგეტიკულ პროდუქტებს.
2018 წელს ADM-მა და Aston Foods and Food Ingredients-მა (ბიზნესმენ ვადიმ ვიკულოვის Aston ჯგუფის ნაწილი) ხელი მოაწერეს შეთანხმებას რიაზანისა და ვლადიმირის რეგიონებში სახამებლისა და სიროფების ერთობლივ წარმოებაზე.
დასავლური კომპანიების წასვლის შემდეგ, დიდი ალბათობით, ხორბლის გლობალურ მარაგზე რუსეთის კონტროლი გაიზრდება, შესაბამისად, მოიმატებს მისი შემოსავალიც.
მარცვლეულის ბაზრის სამწუხარო პერსპექტივა
სახელმწიფოს მიერ დაფინანსებულმა რუსულმა კომპანიებმა უკვე დაიკავეს გლობალური ბაზრის უმეტესი ნაწილი. ამისთვის პუტინმა ექსპორტიორებს საბაჟო გადასახადები მოუხსნა.
აშშ-ის სოფლის მეურნეობის დეპარტამენტის პროგნოზით, რუსეთი 2022-2023 წლების სეზონზე, დაახლოებით, 43,5 მილიონ ტონა მარცვლეულს გაყიდის, რაც რეკორდული მაჩვენებელი იქნება და ბაზარზე ლიდერი გახდება. მთელი ევროკავშირი გაყიდის მხოლოდ 37 მლნ ტონა მარცვლეულს, აშშ – 21,1 მლნ ტონას, ხოლო უკრაინა – 13,5 მლნ ტონას
