იაპონური ფარმაცევტული კომპანია Takeda ყიდის თავის ქარხანას რუსეთში. წარმოება იაროსლავში მდებარეობს და მასში კომპანიას € 117 მილიონზე მეტი ინვესტიცია აქვს ჩადებული.
კომპანია აწარმოებს ინოვაციურ მედიკამენტს Ninlaro-ს, მრავლობითი მიელომით დაავადებულთათვის, რომლის სახელმწიფო შესყიდვები ბოლო სამი წლის განმავლობაში გაორმაგდა. ქარხანაში წარმოებული წამლების ნაწილი EAEU ქვეყნებს მიეწოდება. Takeda Pharmaceutical-ს წელიწადში 90 მილიონი ამპულის და 3 მილიარდზე მეტი ტაბლეტის წარმოება შეუძლია.
იაპონური საწარმოს შესყიდვით რამდენიმე კომპანიაა დაინტერესებული, თუმცა, კონკრეტული მოლაპარაკებები ჯერ არ არის დაწყებული.
რუსეთში ფარმაცევტული სფეროს წარმომადგენლები ვარაუდობენ, რომ 2023 წელს, Takeda-ს გზას შესაძლოა, სხვა დასავლური ფარმაცევტული კომპანიებიც დაადგნენ. რუსეთში 570-მდე უცხოური ფარმაცევტული კომპანია მუშაობს, რომლებსაც რუსული ბაზრის ნახევარზე მეტი უკავიათ, ხოლო რუსულ კომპანიებს – 36%.
ბევრ უცხოურ ფარმაცევტულ კომპანიას და დისტრიბუტორს სირთულეები შეექმნა მიწოდების მოშლისა და პოლიტიკური სიტუაციის გამო, რამაც აიძულა ისინი, თავიანთი გეგმებისთვის გადაეხედათ. ამ კომპანიების უმეტესობამ რუსულ პროექტებში ინვესტიციები შეწყვიტა.
Takeda-ს აქციები ნიუ-იორკის საფონდო ბირჟაზე ივაჭრება. კომპანიის კაპიტალიზაცია თითქმის $51,9 მილიარდია.
