დიდი შვიდეულის ქვეყნები შეშფოთებულები არიან, რომ რუსეთი სარგებლობს შვეიცარიის კანონმდებლობაში არსებული „ხვრელებით“ და ახერხებს სანქციებისთვის თავის არიდებას.
შვეიცარიის ხელისუფლებამ მიიღო წერილი G7-ის ელჩებისგან, სადაც ის გაკრიტიკებულია იმის გამო, რომ შვეიცარიაში რუსულ აქტივებს საშუალება ეძლევათ, სანქციებს დაემალონ.
შვეიცარიული ბანკები, რუსული კვალის დასაფარად, კონფიდენციალურობისა და კერძო კლიენტების უფლებების დაცვას იშველიებენ.
G7-ის ელჩების წერილი ეჭვქვეშ აყენებს იმ ფაქტს, რომ შვეიცარიამ 2022 წელს დაახლოებით €7,6 მილიარდის რუსული აქტივები გაყინა. გამოითქვა ვარაუდი, რომ რუსებს შვეიცარიაში ბევრად უფრო დიდი თანხები აქვთ შენახული.
„შეშფოთებულები ვართ, რომ სამართალდამცავები, პირადი ცხოვრების დაცვის დებულებების გამო, ვერ ახერხებენ გამოიძიონ უკანონო ფინანსური სტრუქტურების საქმიანობა, რომლებიც, ფინანსური შუამავლების როლს ასრულებენ“, – ნათქვამია წერილში.
ისინი მოუწოდებენ შვეიცარიას, შეუერთდეს G7-ის სამუშაო ჯგუფს, რომელიც კოორდინაციას უწევს რუსეთისთვის დაწესებული სანქციების განხორციელებას.
G7-ის მოთხოვნები განხილული იქნება შვეიცარიის პრეზიდენტის – ალენ ბერსისა და გერმანიის კანცლერის – ოლაფ შოლცის შეხვედრაზეც, რომელიც დღეს ბერლინში გაიმართება.
ცოტა ხნის წინ, შვეიცარიამ ევროპული ქვეყნების ბრალდებების საპასუხოდ განაცხადა, რომ მან რუსული აქტივების გაყინვისთვის საკმარისად არ იაქტიურა.
