საავტომობილო გზების დეპარტამენტის ინფორმაციით, ავტოტრანსპორტი გომი-საჩხერე-ჭიათურა-ზესტაფონის საავტომობილო გზაზეც შეფერხებით გადაადგილდება. რადგან გზის რამდენიმე უბანზე დაზიანებული მონაკვეთების სარემონტო სამუშაოები მიმდინარეობს. ტექნიკის მუშაობა ავტოტრანსპორტის გაზრდილი ნაკადების გადაადგილებას აფერხებს.
როგორც ცნობილია, გომი-საჩხერე-ჭიათურა-ზესტაფონის გზაზე ავტოტრანსპორტის მოძრაობის დროებით გადართვა რიკოთის გზის 80 კმ-იან მონაკვეთზე ავტოტრანსპორტის მოძრაობის დროებით აკრძალვის შემდეგ მოხდა. როგორც ცნობილია ამ მონაკვეთზე მოძრაობის აკრძალვა მეწყრის საშიშროებამ გამოიწვია.
გომი-საჩხერე-ჭიათურა-ზესტაფონის აღნიშნული მარშრუტის ორ მონაკვეთზე შევიწროებულია გზის სავალი ნაწილი. კერძოდ: სტიქიის შედეგად დაზიანებული საყრდენი კედლის მშენებლობა მიმდინარეობს ჭიათურაში, 69-ე კმ-ზე; სოფელ კაცხთან, 78-ე კმ-ზე, სარეაბილიტაციო სამუშაოების ფარგლებში, შენდება საყრდენი კედელი; კმ 70-კმ 82-ზე (ჭიათურა-სოფელი ჯოყოეთი) და კმ 84-კმ 106 (სოფელი რკვია-ზესტაფონი) მონაკვეთებზე მიმდინარეობს საავტომობილო გზის რეაბილიტაცია, ხოლო კმ 84-კმ 107 მონაკვეთზე წარმოებს 16 დამეწყრილი უბნის (სოფელი დილიკაურის ტერიტორია) სარეაბილიტაციო სამუშაოები.
საავტომობილო გზების დეპარტამენტის ინფორმაციით, თბილისი-სენაკი-ლესელიძის საავტომობილო გზის 149-ე კმ-ზე ამ დრომდე გრძელდება სპეციალისტების მუშაობა მეწყრული უბნის შესასწავლად. საავტომობილო გზაზე (რიკოთის მონაკვეთზე) მოძრაობის აღდგენის ვადებს საგზაო დეპარტამენტი ჯერ ვერ ასახელებს.
