რესტორან რეტროს მფლობელი თეიმურაზ ვარშანიძე 5 ათასი ლარის გირაოს სანაცვლოდ გაათავისუფლეს. შესაბამისი გადაწყვეტილება ბათუმის საქალაქო სასამართლომ მიიღო. მას ასევე, დაზარალებულ პირთან კომუნიკაცია აუკრძალეს.
ბრალდებულისთვის გირაოს შეფარდება სასამართლოს პროკურატურამ შესთავაზა. პროკურორმა ასევე მოითხოვა, რომ ბრალდებულმა საქმის დასრულებამდე ქვეყანა არ დატოვოს.
თავად თეიმურაზ ვარშანიძემ სასამართლოზე განაცხადა, რომ ხმამაღალი საუბრისთვის საზოგადოებას ბოდიშს უხდის, თუმცა, ბრალს არ აღიარებს. რეტროს მფლობელი ამბობს, რომ ხელით არავის შეხებია და თავს დამნაშავედ არ გრძნობს.
შეგახსენებთ, ორი დღის წინ სოციალურ ქსელში გავრცელდა ვიდეო, სადაც ჩანდა, რომ რესტორან რეტროს მფლობელი ერთ-ერთ მიმტანზე ფიზიკურად ძალადობდა. პოლიციამ რესტორნების ქსელის მფლობელი დააკავა.
შემთხვევის გამო შრომის ინსპექცია რეტროში შევიდა. შემოწმების შედეგად გამოვლენილი უსაფრთხოების ნორმების დარღვევისა და არასათანადო სამუშაო პირობების გამო, შრომის ინსპექციის სამსახურმა შპს რეტროსა და შპს რესტრო 2-ს სამუშაო პროცესი შეუჩერა და 30 ათასი ლარის ოდენობის ჯარიმა დააკისრა.
