მსოფლიო ბანკის პროგნოზის თანახმად, მომდევნო ორი წლის განმავლობაში მოსალოდნელია ეკონომიკური ზრდის შენელება კავკასიისა და ცენტრალური აზიის უმრავლეს ქვეყანაში. ორგანიზაციის შეფასებით, მშპ-ის ყველაზე დიდი კლება საქართველოსა და აზერბაიჯანში იქნება, პოლიტიკური კრიზისისა და ნავთობის მოპოვების შემცირების გამო. მსოფლიო ბანკი ვარაუდობს, რომ ცენტრალური აზიის ეკონომიკა ძირითადად უცვლელი დარჩება, ხოლო ყაზახეთი ნავთობის ექსპორტის გაზრდის გამო ზრდას განიცდის.
“პოლიტიკურ კრიზისის გამო, რასაც საქართველო განიცდის, რომელიც გამოწვეულია მთავრობის დასავლური გეოპოლიტიკური კურსიდან მკვეთრი გადახვევით, სავარაუდოდ, რეალური მშპ-ის ზრდის ტემპი 2024 წელს ნავარაუდევი 9%-დან 2026 წლისთვის 5%-მდე შემცირდება. აზერბაიჯანის ზრდის ტემპი გასული წლის 4%-დან 2026 წელს 2.4%-მდე შემცირდება, ნავთობის მოპოვების მოსალოდნელი ვარდნის გამო. სომხეთის ზრდის ტემპი ზომიერად დაეცემა და შესაბამისად, 2024 წლის 5,5%-დან მომავალ წელს 4,6%-მდე შემცირდება”,- აღნიშნულია მსოფლიო ბანკის ანგარიშში, რომელიც მიმდინარე თვეში გამოქვეყნდა, სახელწოდებით “გლობალური ეკონომიკური პერსპექტივები”.
მსოფლიო ბანკის პროგნოზის თანახმად, ცენტრალური აზიის ქვეყნების უმეტესობაში ეკონომიკური ზრდა ძირითადად უცვლელი დარჩება ან მომდევნო წლებში უმნიშვნელო ვარდნას განიცდის. ნავთობის ექსპორტის ზრდის ხარჯზე სავარაუდოდ, ყაზახეთის მშპ 2025 წელს 4,7%-მდე მოიმატებს გასული წლის სავარაუდო 4%-იან ზრდასთან შედარებით. მაგრამ 2026 წელს მოსალოდნელია, რომ აღნიშნულმა მაჩვენებელმა 3,5%-მდე დაიწიოს.
ცენტრალურ აზიაში ყველაზე ცუდი ეკონომიკური მაჩვენებელი სავარაუდოდ, ტაჯიკეთს ექნება. მისი მშპ-ს ზრდის ტემპი 2026 წელს 5%-მდე შემცირდება შარშანდელ 8%-თან შედარებით. მოსალოდნელია, რომ ყირგიზეთსა და უზბეკეთში ზრდის ტემპები შედარებით სტაბილური დარჩება მომდევნო ორი წლის განმავლობაში, შესაბამისად, 4,5% და 5,8%. მსოფლიო ბანკმა თურქმენეთის ეკონომიკური მონაცემები არ გამოაქვეყნა.
