ეკონომისტების უმრავლესობა, რომლებიც PMCG-ს მიერ ჩატარებულ კვლევაში მონაწილეობდა, მიიჩნევს, რომ ტრენინგების ჩატარება ქვეყანას შრომის ბაზარზე არსებული პრობლემების გადაჭრაში დაეხმარებოდა. შრომის ბაზარზე არსებულ პრობლემებში, პირველ რიგში, იგულისხმება კვალიფიციური კადრების დეფიციტი.
ეკონომისტთა 72% ფიქრობს, რომ ტრენინგები, სავარაუდოდ, ძალიან ეფექტური, ეფექტური ან ზომიერად ეფექტური გზაა. ამავდროულად, ეკონომისტების 54%-ს სჯერა, რომ ახალი ბიზნესების სტიმულირება აუცილებელია შრომის ბაზარზე პრობლემების აღმოსაფხვრელად.
მთავრობის მიერ სამუშაო ადგილების პირდაპირ შექმნასა და დასაქმების სუბსიდირებას ეკონომისტების უმეტესობა არაეფექტურად ან ნაკლებად ეფექტურად მიიჩნევს. მხოლოდ 11% ფიქრობს, რომ სამუშაო ადგილების პირდაპირი შექმნა ძალიან ეფექტური იქნება.
დასაქმების საჯარო სერვისებზე, რომელიც მთავრობა ახორციელებს, ეკონომისტებს შორის, განსხვავებული შეხედულება არსებობს: 50% მიიჩნევს, რომ ის არაეფექტური ან ნაკლებად ეფექტურია, ხოლო ექსპერტების 39%-ის აზრით, ის ზომიერად ეფექტური ან ეფექტურია.
