საქართველოს პარლამენტი საქართველოს მოქალაქეობის შესახებ ორგანულ კანონში ცვლილებების განხილვას იწყებს.
კანონპროექტს, რომელიც საქართველოს მოქალაქეობის მინიჭების წესს ცვლის, პარლამენტის ბიუროს სხდომაზე დღეს წარადგენენ.
საქართველოს იუსტიციის მინისტრმა რატი ბრეგაძემ გასულ კვირას განაცხადა, რომ კანონში ცვლილებებით საზღვარგარეთ მცხოვრები თანამემამულეებისთვის საქართველოს მოქალაქეობის მიღების პროცედურები მარტივდება.
როგორც მინისტრის განმარტებიდან ირკვევა, კანონში ოთხი მნიშვნელოვანი ცვლილება შედის. მათ შორის ის, რომ:
- მოქალაქეობის არმქონე პირისთვის საქართველოში ცხოვრების 10-წლიანი მოთხოვნა ნახევრდება.
- მოქალაქეობის მიღების მსურველს ქართული ენის ტესტზე გასვლა შეუზღუდავი რაოდენობით შეეძლება.
- საქართველოს მოქალაქეობის მოპოვების მსურველ პირს შესაბამისი გამოცდის ჩაბარება სახელმწიფო სერვისების განვითარების სააგენტოსთვის მოქალაქეობის მინიჭებაზე განცხადებით მიმართვამდე მოუწევს და დამაკმაყოფილებელი შედეგის შემთხვევაში სააგენტო მოქალაქეობის მინიჭების ფორმალურ პროცედურებს აღარ დაიწყებს.
- საქართველოს მოქალაქეობის მოპოვების შესახებ განცხადებაზე საბოლოო უარყოფითი გადაწყვეტილების მიღების შემთხვევაში მოქალაქეობის მინიჭების პროცედურის ხელმეორედ დაწყების ვადა ერთი წლიდან 6 თვემდე მცირდება.
„ცვლილება ეხება იმას, რომ პირს უფლება ექნება წარუმატებლობის შემთხვევაში გამოცდა შეუზღუდავად გადააბაროს. იმ შემთხვევაში, თუ კი მას ექნება დადებითი შედეგი ეს ძალაში ერთი წლის განმავლობაში იქნება. ასევე, საქართველოს მოქალაქეობის მოპოვების შესახებ განცხადებაზე საბოლოო უარყოფითი გადაწყვეტილების მიღების შემთხვევაში მოქალაქეობის მინიჭების პროცედურის ხელმეორედ დაწყების ვადა ერთი წლიდან 6 თვემდე მცირდება, რაც საკმაოდ დიდი შეღავათი იქნება იმ პირებისთვის, რომლებსაც უნდათ, რომ საქართველოს მოქალაქეობა მიიღონ.
როგორც მოგეხსენებათ საქართველოს მოქალაქეობის მიღება შეუძლიათ, მათ შორის, იმ პირებს, რომლებიც საქართველოს ტერიტორიაზე ცხოვრობენ და არც ერთი ქვეყნის მოქალაქეობა არ აქვთ. დღევანდელ დღემდე მათ საქართველოში 10 წლიანი ცხოვრების ცენზი მოეთხოვებათ, ხოლო მას შემდეგ რაც ჩვენ მიერ წარდგენილი საკანონმდებლო ინიციატივას პარლამენტი მიიღებს, მათ 5 წელი მოეთხოვებათ“, – განაცხადა რატი ბრეგაძემ.
2022 წლის 24 თებერვლიდან 2023 წლის 8 თებერვლამდე პერიოდში საქართველოს მოქალაქეობის მიღებასთან დაკავშირებით იუსტიციის სამინისტროს 8544 პირმა მიმართა, საიდანაც 97,5% რუსეთის მოქალაქეებზე მოდიოდა.
ამ პერიოდში საქართველომ რუსეთისა და უკრაინის 3375 მოქალაქეს მიანიჭა მოქალაქეობა.
