დასავლეთი ცდილობს, ყაზახეთი რუსეთში სანქცირებული პროდუქციის ექსპორტის შეზღუდვაზე დაიყოლიოს.
ეს იყო გასულ კვირას დიდი ბრიტანეთის საგარეო საქმეთა მინისტრის – ჯეიმს კლევერლის ყაზახეთში ჩასვლის ძირითადი მიზეზი. ბრიტანელი დიპლომატი შუა აზიაში საქართველოში ვიზიტის შემდეგ ჩავიდა. ოფიციალურად გავრცელებული ინფორმაციით, ის თბილისს კიბერთავდასხმებისგან თავდაცვასა და ევროკავშირთან და NATO-სთან დაახლოებაში დახმარებას დაჰპირდა.
როგორც ცნობილია, ყაზახეთი რუსეთისთვის სანქცირებული საქონლის იმპორტის ერთ-ერთ მთავარ მარშრუტს წარმოადგენს. სავარაუდოდ, ვიზიტის დროს საუბარი ამ თემასაც შეეხებოდა. ბრიტანელი დიპლომატი ყაზახეთს დაჰპირდა, რომ დაეხმარება რუსეთის გვერდის ავლით საექსპორტო მარშრუტების განვითარებაში. მან ასევე ხელი მოაწერა მემორანდუმს ყაზახეთის მიერ იშვიათი ლითონების მიწოდების შესახებ.
მან ყაზახეთის პრეზიდენტთან კასიმ ტოკაევთან განიხილა ყაზახეთის ნავთობის ექსპორტის პრობლემები, რომელთა უმეტესობა რუსეთში გადის. შეხვედრაზე განიხილეს ალტერნატიული მარშრუტების განვითარების საკითხიც. ალტერნატიული მარშრუტი კვეთს კასპიის ზღვას, აზერბაიჯანს, საქართველოს და თურქეთს და, ის სიმძლავრის გასაზრდელად, მნიშვნელოვან ინვესტიციებს საჭიროებს. ყაზახეთმა ამ გზით უკვე დაიწყო ნედლეულის გადაზიდვა.
ყაზახეთს აქვს მსოფლიოში ურანის მადნის თითქმის ნახევარი და ფლობს იშვიათი ლითონების დიდი საბადოებს, რომლებსაც დასავლეთი ტრადიციულად ჩინეთიდან ან რუსეთიდან იღებდა.
ტოკაევის ბოლოდროინდელი განცხადებები აჩვენებს, რომ უკრაინაში შეჭრის შემდეგ მოსკოვთან დისტანცირებას ცდილობს და დასავლეთთან დაახლოების სურვილს არ მალავს.
