რესპუბლიკური საავადმყოფოს პროფილი შეუნარჩუნდება და არც ადგილს შეიცვლის, – ამის შესახებ განმარტება ჯანდაცვის მინისტრის პირველმა მოადგილემ თამარ გაბუნიამ გააკეთა.
მისი თქმით, ახალი, თანამედროვე სტანდარტებისა და მაღალტექნოლოგიურად აღჭურვილი სახელმწიფო კლინიკა იმავე ადგილზე იქნება, სადაც დღეს, რესპუბლიკური საავადმყოფო მდებარეობს.
გაბუნიას თქმით, პროექტი რესპუბლიკური საავადმყოფოს განახლებას და გადაიარაღებას ითვალისწინებს. ხოლო სამშენებლო სამუშაოების, კლინიკის რეკონსტრუქციას და აღჭურვის პერიოდში სრულად იქნება დაცული სამედიცინო პერსონალის უფლებები, როგორც ანაზღაურების, ისე დასაქმების თვალსაზრისით.
მანამდე ჯანდაცვის მინისტრმა ზურაბ აზარაშვილმა განაცხადა, რომ რესპუბლიკური საავადმყოფოს შენობის რეკონსტრუქცია შეუძლებელი იყო. ფინანსურად უფრო ეფექტიანი იქნებოდა, თუ ის დაინგრეოდა და მის ადგილზე ახალი შენობა აშენდებოდა.
მინისტრის განცხადებას თანამშრომლების პროტესტი მოჰყვა. მათ ღია წერილით მიმართეს ჯანდაცვის მინისტრს, სადაც საავადმყოფოს შენობის ნგრევასთან დაკავშირებით განმარტებას ითხოვდნენ.
თანამშრომლების თქმით, საავადმყოფოში დაიხურა კოვიდთერაპიისა და პედიატრიული განყოფილებები და მზადდება სხვა დეპარტამენტების ლიკვიდაციაც. ისინი შიშობენ, რომ საავადმყოფოს დახურვის შემდეგ 1 000-მდე თანამშრომელი უმუშევარი დარჩება.
ჯანდაცვის უწყება აცხადებს, რომ ახალი რესპუბლიკური საავადმყოფოს პროექტის პრეზენტაციას უახლოეს მომავალში გამართავს.
