ხვალ, 10 მაისს, ეროვნული ბანკი თავის მონეტარულ პოლიტიკას გადახედავს. თუ სებ-ი ჩათვლის, რომ ინფლაცია საკმარისად შემცირდა და ბაზარზე სტაბილური სიტუაციაა, ის რეფინანსირების განაკვეთს შეამცირებს.
რეფინანსირების განაკვეთის მექანიზმით ეროვნული ბანკი ცდილობს, ფასები დაასტაბილუროს.
რეფინანსირების განაკვეთი სებ-მა 2022 წლის მარტში 11%-მდე გაზარდა და ის უკვე ერთ წელზე მეტია, უცვლელია.
შემცირდება თუ არა განაკვეთი?
ეკონომისტების შეფასებით, ყველა წინაპირობა არსებობს, რომ ეროვნული ბანკის მონეტარული პოლიტიკის კომიტეტმა განაკვეთი შეამციროს.
TBC Capital ვარაუდობს, რომ რეფინანსირების განაკვეთი 0.5%-ით დაიწევს, ხოლო წლის ბოლომდე, არსებული 11%-დან სულ მცირე, 9.5%-მდე მაინც შემცირდება.
Galt&Taggart-ის შეფასებით, წლიური ინფლაციის ტემპის მოსალოდნელზე მეტად შენელების პირობებში, სებ-ი ხვალიდან მონეტარული პოლიტიკის განაკვეთის შემცირებას დაიწყებს.
როგორც წესი, რეფინანსირების განაკვეთის ცვლილება საბაზრო საპროცენტო განაკვეთებს გადაეცემა. კერძოდ, მისი შემცირების შემთხვევაში, საბანკო სესხის პროცენტიც დაიწევს.
