TBC Capital-ის კვლევამ აჩვენა, რომ საქართველოს მცხოვრებლებმა 2023 წლის პირველ კვარტალში, ყველაზე მეტი ხარჯი, 21.8 მილიარდი ლარი, სურსათსა და საყოფაცხოვრებო საქონელზე გასწიეს , შემდეგ კი გარეთ კვებაზე – 4.6 მილიარდი ლარი.
გასულ წლებთან შედარებით, ყველაზე მეტად ხარჯვა სწორედ სურსათისა და საყოფაცხოვრებო საქონლის მიმართულებით გაიზარდა. 2023 წლის მონაცემებით, აღნიშნული მაჩვენებელი 2022 წელს 18.6 მილიარდ ლარს, 2021 წელს კი 13.6 მილიარდ ლარს შეადგენდა.
ქვეყნის სამომხმარებლო ბაზარზე მზარდია მიგრანტების დანახარჯებიც. TBC Capital-ის მონაცემებით, მიგრანტების რაოდენობა საქართველოში 2022 წლის მსგავსად, 2023 წელსაც 115 ათასია, თუმცა, მიმდინარე წელს, დანახარჯებში მათი წილის 5.8%-მდე – $1.66 მილიონამდე მატებაა მოსალოდნელი.
TBC Capital-ის კვლევამ ასევე აჩვენა, რომ 2023 წლის პირველ კვარტალში არარეზიდენტების, სხვა ქვეყნის იურიდიული და ფიზიკური პირების, უნაღდო დანახარჯები კვლავ მაღალ ნიშნულზეა და მნიშვნელოვნად აღემატება 2019 წლის ხარჯვის მაჩვენებელს. სასტუმროში გადახდები და გარეთ კვება არარეზიდენტებისთვის 2023 წლის პირველ კვარტალშიც უმსხვილეს ხარჯვით კატეგორიად რჩება.
TBC Capital-ის ანალიტიკოსები ვარაუდობენ, რომ სამომხმარებლო სექტორში მოსახლეობის დანახარჯების ზრდის ტენდენცია მიმდინარე წლის დარჩენილ პერიოდშიც შენარჩუნდება და 15%-ით გაიზრდება. ზრდა იქნება სამომხმარებლო სექტორის ყველა მსხვილ ქვედარგში (გარეთ კვება, ფარმაცია, საწვავი, ტანსაცმელი, სამშენებლო მასალები, ავეჯი, ელექტრონიკა), რაც განპირობებული იქნება ძლიერი ადგილობრივი მოთხოვნით, ასევე, მიგრანტებითა და ტურიზმის აღდგენით.
