ყველაზე პოპულარული კრიპტოვალუტის – ბიტკოინის ფასი სულ რაღაც 10 დღეში, დაახლოებით 40%-ით გაიზარდა.
ბოლო ვაჭრობის დროს ბიტკოინი კიდევ 1%-ით გაძვირდა და ფასი $28,630-ს გადასცდა.
გაძვირდა სხვა კრიპტოვალუტებიც. მაგალითად, სიდიდით მეორე კრიპტოვალუტის – ეთერიუმის ფასმა $1,800-ს მიაღწია.
ანალიტიკოსები კრიპტოვალუტის ფასის სწრაფ მატებას მიაწერენ ინტერესის ზრდას რისკისადმი მგრძნობიარე აქტივების მიმართ, როგორიც არის ბიტკოინი.
კრიპტოვალუტების გაძვირებას ბიძგი მისცა დიდი ბანკების გაკოტრებამ და საბანკო ბაზარზე შექმნილმა არასტაბილურმა სიტუაციამ.
ასეთი აქტივებისადმი ინტერესი კი განაპირობა ინვესტორების მოლოდინმა, რომ ფედერალური რეზერვის საპროცენტო განაკვეთები პიკს მიუახლოვდა და მისი კიდევ უფრო ზრდა შესაძლოა, აღარ მოხდეს.
ინვესტორები არ გამორიცხავენ, რომ ფედერალურმა რეზერვმა წლის ბოლომდე მონეტარული პოლიტიკის შემსუბუქების გადაწყვეტილება მიიღოს, რაც, დადებითად აისახება კრიპტოაქტივების ფასებზე.
მაგრამ კრიპტოაქტივების მიმართ სიფრთხილის გამოჩენა აუცილებელია. ეს აჩვენა წარსულმა გამოცდილებამ. როგორც ცნობილია, გასულ წელს სხვადასხვა გახმაურებული კრიპტოფირმების ჩაძირვამ კრიპტოვალუტის მფლობელებს დიდი ზარალი მიაყენა.
