მსოფლიო ბაზარზე ფეროსილიკონის ფასი ისევ მცირდება. ფასის კლება აგვისტოს თვეშიც გაგრძელდა.
Galt&Taggart-ის მიმოხილვის მიხედვით, 2024 წლის აგვისტოში ევროპული ფეროსილიკონის ფასი თვიურად 1.6%-ით, ჩინურის კი 0.8%-ით შემცირდა. ევროპაში ფეროსილიკონის ფასის კლებას საწარმოო სიმძლავრეების შესუსტება და დაბალი მოთხოვნა განაპირობებს. ჩინეთში კი კვლავ ეკონომიკური პრობლემები და უძრავი ქონების კრიზისია.
სხვა მეტალების მსგავსად, ფეროსილიკონის ფასების კლებაც ჩინეთის სუსტ ეკონომიკას უკავშირდება.
რკინის მადნის ფასი 2022 წლის შემდეგ პირველად დაეცა ტონაზე $90-ზე დაბლა – ფასი დაახლოებით მესამედითაა შემცირებული წლის დასაწყისიდან. დამატებით, 2017 წლის შემდეგ ყველაზე დაბალი ფასი ფიქსირდება არმატურაზე, 4-წლიანი მინიმუმი კი ფოლადზე.
2024 წლის აგვისტოს თვეში საქართველოდან ფეროშენადნობების ექსპორტის ღირებულება წლიურად 81.1%-ით, მოცულობა კი 95.2%-ით გაიზარდა. 2024 წლის 7 თვეში ექსპორტმა 177,000 ტონა შეადგინა.
2023 წელს საქართველოდან ფეროშენადნობების ექსპორტი რეკორდულად შემცირდა. წელს ტენდენცია შეიცვალა და ექსპორტმა მოიმატა. საქართველოსთვის ფეროშენადნობების მთავარი საექსპორტო ბაზრები თურქეთი, აშშ, ეგვიპტე, იტალია, ალჟირი, უკრაინა, რუსეთი, ესპანეთი, აზერბაიჯანი და ნიდერლანდებია.
