საქართველო თითქმის მთლიანად იმპორტირებულ ბუნებრივ აირს მოიხმარს და მისი მოცულობა თანდათან იზრდება. შესაბამისად, მატულობს მოწოდებული აირის სანაცვლოდ გადახდილი თანხის მოცულობაც.
იმპორტირებული აირის ოდენობა განსაკუთრებით მიმდინარე ზამთრის სეზონზე გაიზარდა. მომატებულია გაზის საიმპორტო ფასიც.
მიმდინარე წლის იანვარ-მარტში საქართველოში სულ $221.6 მლნ-ს 1.3 მლრდ მ³ გაზის იმპორტი განხორციელდა, რაც მოცულობით 2022 წლის ანალოგიური პერიოდის მაჩვენებელზე 5.6%-ით მეტია (1.2 მლრდ მ³). ხოლო ფულად გამოსახულებაში გადახდილია 22.3%-ით მეტი ($181.2 მლნ).
საქართველოსთვის გაზის მომწოდებლები არიან:
- აზერბაიჯანი – 924.9 მლნ მ³,( $150.3 მლნ), ფასი $162.5;
- რუსეთი – 385.2 მლნ მ³, ($71.3 მლნ), ფასი $185;
რუსეთიდან გაზის იმპორტი გაზრდილია 123%-ით წინა წლის იმავე პერიოდთან შედარებით. მოწოდებული აირის სანაცვლოდ, რუსეთში 385.2 მლნ მ³ გადაირიცხა,
წინა წლის იმავე პერიოდთან შედარებით, აზერბაიჯანიდან იმპორტი შემცირდა 0.7%-ით.
წელს თითქმის 16%-ით არის გაზრდილი გაზის საიმპორტო ფასი. თუ შარშან პირველ კვარტალში 1000 მ³ გაზის შესყიდვის ფასი $146 იყო, წელს მისი ფასი $169.1 გახდა.
გაზი ელექტროენერგიისთვის
რატომ გაიზარდა გაზის იმპორტი? როგორც ირკვევა, მთავრობამ ამჯობინა, ზამთრის სეზონზე ელექტროენერგიის დეფიციტი ადგილობრივი თბოსადგურების მიერ გამომუშავებული ელექტროენერგიით შეევსო. თბოელექტროსადგურებს კი წარმოების გასაზრდელად ბუნებრივი აირის დამატებითი მოცულობა დასჭირდათ და მისი იმპორტი რუსეთიდან განხორციელდა.
სემეკის თავმჯდომარის – დავით ნარმანიას განმარტებით, თურქეთში ელექტროენერგიის სიძვირის გამო საქართველომ ამჯობინა, ადგილობრივი თბოელექტროსადგურების გამომუშავებული ელექტროენერგია შეესყიდა. შესაბამისად, საქართველომ მეზობელი ქვეყნებიდან ელექტროენერგიის მინიმალური იმპორტი განახორციელა.
მისი თქმით, „სისტემამ უფრო იაფად მიიღო თბოსადგურების გამომუშავებული ელექტროენერგია. ის ფასით სჯობდა თურქეთიდან იმპორტირებულს, სადაც კილოვატი ენერგიის ტარიფი მინიმუმ 20-21 ცენტია. ელექტროენერგიის ტარიფის შენარჩუნებას ამან შეუწყო ხელი“, – აღნიშნა დავით ნარმანიამ.
თებერვალში ელექტროენერგიის წარმოებისთვის გამოყენებულმა გაზის რაოდენობამ 153.4 მლნ.მ³ შეადგინა, რაც 132%-ით მეტია წინა წლის ანალოგიურ მაჩვენებელთან შედარებით (2022 თებერვალი – 66 მლნ.მ³)
საქართველოს ელექტროენერგეტიკული ბაზრის ოპერატორის (ESCO) ინფორმაციით, თებერვალში თბოელექტროსადგურებმა 642.8 გეგავატ.სთ ელექტროენერგია გამოიმუშავეს, რაც 94%-ით მეტია წინა წლის თებერვლის მაჩვენებელზე (2022 თებ: 331.3 გეგავატ.სთ).
ამავე პერიოდში ჰიდროელექტროსადგურების გამომუშავება, წინა წლის თებერვალთან შედარებით, 23.1%-ით შემცირდა და 338.9 გეგავატ.სთ შეადგინა (2022 თებ: 440.7 გეგავატ.სთ).
