სუპერმარკეტების ბიზნესი საქართველოში ერთ-ერთი ყველაზე მომგებიანია. მისი მომგებიანობა განსაკუთრებით გაიზარდა ბოლო ერთი წლის განმავლობაში, რაც მაღალი ინფლაციის, ტურიზმისა და მიგრანტების დანახარჯების ზრდის გამო მოხდა. ამასთან ერთად, გაზრდილია ადგილობრივი მოსახლეობის დანახარჯებიც. ასეთი შედეგი აჩვენა TBC Capital-ის მიერ ჩატარებულმა კვლევამ საქართველოს სამომხმარებლო პროდუქციით ვაჭრობის სექტორის (FMCG) შესახებ.
2022 წელს ეს სექტორი წლიური 37%-ით გაიზარდა და მისმა ბრუნვამ 5.9 მილიარდი ლარი შეადგინა.
რატომ ხარჯავს მოსახლეობა მარკეტებში მეტ ფულს?
გაზრდილი ხელფასი: კვლევის მიხედვით, სამომხმარებლო პროდუქტებზე დანახარჯების ზრდის ერთ-ერთი ძირითადი ფაქტორი ქვეყანაში ნომინალური ხელფასის ზრდაა.
როგორც კვლევის ავტორები აღნიშნავენ, ქვეყანაში ნომინალურმა ხელფასმა სამომხმარებლო ფასებზე მეტად მოიმატა, რამაც ადგილობრივი მოსახლეობის დანახარჯების ზრდას შეუწყო ხელი.
კვლევის ავტორები ასევე მიუთითებენ, რომ მოსახლეობის მიერ სამომხმარებლო პროდუქციაზე გაწეული დანახარჯების წილი მთლიან დანახარჯებში ჯერ კიდევ მზარდია, რაც გარკვეულწილად საშუალო კლასის გაძლიერებასთანაა დაკავშირებული.
მიგრანტები: სამომხმარებლო პროდუქტების გაყიდვების ზრდას ხელი შეუწყო როგორც ადგილობრივი მოსახლეობის მომატებულმა დანახარჯებმა, ასევე მიგრანტებმაც.
ქვეყანაში შემოსული მიგრანტების მატებამ FMCG-ის ბაზრის მოცულობა კიდევ უფრო გაზარდა. FMCG-ის ბაზრის ზრდა ძლიერი იყო როგორც თბილისში, ისე რეგიონში. მიგრანტები კი ძირითადად ამ ქალაქებში არიან. მნიშვნელოვნად იყო გაზრდილი მათი შემოსავლები, რაც მათ საშუალებას აძლევდა მეტი დაეხარჯათ.
ტურიზმის აღდგენა: მესამე მნიშვნელოვანი ფაქტორი, რომელმაც ასევე თავისი წვლილი შეიტანა სამომხმარებლო პროდუქციის გაზრდილ გაყიდვებში, ტურისტებია.
საქართველოში შარშან ტურიზმის სექტორი აღდგა და როგორც კვლევის ავტორები ვარაუდობენ, ეს აღდგენა წელსაც გრძელდება. შესაბამისად, სამომხმარებლო პროდუქციის გაყიდვები წელსაც მომიმატებს.
TBC Capital-ის მკვლევრების პროგნოზით, მაღალი კონკურენციის პირობებშიც, მომდევნო სამი წლის განმავლობაში სექტორის საშუალოდ წლიური ზრდა 12% იქნება.
დიდი ზომის სუპერმარკეტები FMCG-ის ბაზარზე წილებს ასე ინაწილებენ:
ნიკორა – 18.1%
ორი ნაბიჯი – 17.0%
სპარის სხვა ფრენჩაიზები (დეილი, სპარი) – 16.8%
კარფური – 15.0%
მაგნიტი – 10.8%
გუდვილი – 4.3%
აგროჰაბი – 4.1%
ბოლო წლებში ბაზარზე მცირდება შედარებით მცირერ ზომის კომპანიების წილი. 2022 წელს ისინი ბაზრის 13.8%-ს იკავებდნენ.
შედარებით მცირე კომპანიების წილი ბაზარზე:
ფრესკო – 3.1%
მემო/უნივერსამი – 3.0%
ზღაპარი – 3.0%
მადაგონი – 2.2%
ევროპროდუქტი – 1.3%
ექსპრეს ქსელი – 1.1%
სმარტი – 0.9%
