კვლევები აჩვენებს, რომ დედაქალაქში უძრავი ქონების ფასს პიკისთვის ჯერ არ მიუღწევია. საცხოვრებელი ბინების გაძვირება 2023 წელსაც გაგრძელდება. TBC Capital-ის პროგნოზით, დოლარში გამოსახული გასაყიდი ფასი 2023 წელს 18.5%-ით, ხოლო ქირა 42.8%-ით გაიზრდება (წლიურ ჭრილში). ასეთი მაღალი ზრდა მეტწილად 2022 წლის პირველ ნახევარში არსებული დაბალი საბაზო ეფექტით არის გამოწვეული. უფრო მარტივად რომ ავხსნათ, მაღალი პროცენტული მაჩვენებლები იმან განაპირობა, რომ ფასის ათვლა იწყება 2022 წლის პირველ ნახევრიდან, როცა ბინების გაძვირება ჯერ არ იყო დაწყებული.
2023 წლის იანვარში გაყიდული ბინების უმეტესობა (74%) არის 75 კვ.მ-ზე ნაკლები ფართობის. მთლიან გაყიდვებში ყველაზე დიდი წილი (42%) 50-დან 75 კვ.მ-მდე ფართობის ბინებს უკავია და მხოლოდ 5% აღემატება 125 კვ.მ-ს. მსგავსი სურათი შეინიშნება 2022 წლის იანვარსა და დეკემბერში.
TBC Capital-ის მიმოხილვა აჩვენებს, რომ იანვარში, წინა წლის იმავე პერიოდთან შედარებით, მოიმატა მაღალფასიანი ბინების გაყიდვებმა.
2023 წლის იანვარში თბილისში სულ 550 ახალი ბინა გაიყიდა, რაც წინა წლის იმავე პერიოდთან შედარებით 8%-ით მეტია. ხოლო დეკემბრის თვესთან შედარებით, იანვარში გაყიდვები 34% -ით ნაკლებია.
