რუსეთის პრეზიდენტმა საქართველოსთან პირდაპირი ავიამიმოსვლის აკრძალვის გადაწყვეტილება გააუქმა. ბრძანებულება 10 მაისით არის დათარიღებული და ხელმოწერისთანავე ამოქმედდა.
რუსეთის პრეზიდენტის ამ გადაწყვეტილებით, უქმდება 2019 წლის ივნისში გამოცემული ბრძანებულება, რომლითაც საქართველოსთან პირდაპირი ფრენები აიკრძალა.
ფრენების აღდგენასთან ერთად, ვლადიმერ პუტინის გადაწყვეტილებით, 15 მაისიდან საქართველოს მოქალაქეებს რუსეთში უვიზოდ ყოფნა 90 დღის განმავლობაში შეეძლებათ.
რუსეთმა საქართველოსთან პირდაპირი ავიამიმოსვლა 2019 წლის ზაფხულიდან, პრეზიდენტ პუტინის გადაწყვეტილებით, გააუქმა, რასაც წინ უძღოდა რუსული ოკუპაციის საწინააღმდეგო აქციები, რომელიც სერგეი გავრილოვის მიერ საქართველოს პარლამენტის თავმჯდომარის ადგილის დაკავებას მოჰყვა.
