რუსეთის პრეზიდენტის ყოფილი ცოლის – ლუდმილა ოჩერეტნაიას მიკროსაფინანსო ორგანიზაცია CarMoney-მა 2022 წელს $4,8 მილიონი იშოვა. ტელეგრამის არხის – We Can Explain-ის თანახმად, ომის ერთი წლის განმავლობაში CarMoney-ის წმინდა მოგება 66%-ით გაიზარდა.
2022 წლის პირველ ნახევარში CarMoney-მა მეხუთე ადგილი დაიკავა მოგების მხრივ მიკროსაფინანსო ორგანიზაციებს შორის, მერვე ადგილზე იყო მიკროსესხების პორტფელით.
კომპანია ავტომობილებით უზრუნველყოფილ სესხებს გასცემს. ის 2010 წელს შეიქმნა, მაგრამ მას შემდეგ განვითარდა, რაც მფლობელებს შორის ოჩერეტნაია გამოჩნდა. მიკროსაფინანსო ორგანიზაცია 2022 წლის დეკემბრის ბოლომდე კვიპროსული ოფშორული Carmoney CY LTD-ის მფლობელობაში იყო, რომელსაც, თავის მხრივ კომპანია Meridian მართავს. ამ კომპანიის 99% ასევე, რუსეთის პრეზიდენტის ყოფილ ცოლს ეკუთვნის.
2022 წლის დეკემბრის ბოლოს მიკროსაფინანსო ორგანიზაციამ მფლობელი შეიცვალა. კომპანია მთლიანად გადავიდა რუსული კომპანიის მფლობელობაში, რათა დასავლეთის სანქციები აერიდებინა თავიდან. თავად ოჩერეტნაია უკვე დიდი ბრიტანეთის მიერ სანქცირებულთა სიაშია.
რუსეთის პრეზიდენტის ყოფილ ცოლმა, სავარაუდოდ, შეინარჩუნა კომპანიაზე კონტროლი. რადგან მიკროსაფინანსო ორგანიზაციის ოფისი ამჟამად მოსკოვის ცენტრში, იმ შენობაშია, რომელიც ოჩერეტნაიასა და მის მეუღლეს, არტურ ოჩერეტნის ეკუთვნით.
