პოლონეთის მთავრობის შემდეგ უკრაინული მარცვლეულისა და სოფლის მეურნეობის სხვა პროდუქციის იმპორტი უნგრეთმაც შეაჩერა. ღონისძიება დროებითია და ის 30 ივნისამდე იმოქმედებს.
„ჩვენ ვართ და ვრჩებით უკრაინის მეგობრებად და მოკავშირეებად, ოდნავი ცვლილების გარეშე. ჩვენ მას დავუჭერთ მხარს, მაგრამ ამას ახლა ვაკეთებთ იმიტომ, რომ ყოველი მთავრობის მოვალეობაა, დაიცვას საკუთარი მოქალაქეების ინტერესები”, – აღნიშნა პოლონეთის სოფლის მეურნეობის მინისტრმა.
მისი თქმით, მარცვლეულის შემოტანა რომ არ აეკრძალათ, პოლონელი ფერმერები დაზარალდებოდნენ და ამას პოლიტიკური ოპონენტები საზოგადოებაში უკმაყოფილების გასაღვივებლად გამოიყენებენ.
პოლონეთის შემდეგ უკრაინიდან იმპორტის დროებით შეჩერების შესახებ უნგრეთმაც გამოაცხადა. უნგრეთის სოფლის მეურნეობის მინისტრმა თქვა, რომ უკრაინიდან პროდუქციის იმპორტმა „შეუძლებელი გახადა ადგილობრივი და ცენტრალური ევროპელი ფერმერებისთვის მათი პროდუქციის გაყიდვა”.
„მთავრობა ცდილობს დაიცვას უნგრელი ფერმერების ინტერესები და დროებით აკრძალავს მარცვლეულისა და ნავთობპროდუქტების იმპორტს უკრაინიდან. ასევე, შეჩერდება ზოგიერთი სხვა სასოფლო-სამეურნეო პროდუქტის იმპორტიც, როგორც ეს პოლონეთმა გააკეთა“, – განაცხადა უნგრეთის სოფლის მეურნეობის მინისტრმა.
