პირი, რომელმაც აშშ-ის დაზვერვის საიდუმლო მასალები გაავრცელა, შესაძლოა, მუშაობდა აშშ-ის სამხედრო ბაზაზე, – ამის შესახებ Washington Post წერს. ის პირი, რომელიც საიდუმლო სამხედრო დოკუმენტების მასიური გაჟონვის უკან დგას, საიდუმლოებებს სოციალურ ქსელში, ნაცნობების ჯგუფში აქვეყნებდა, – იტყობინება გამოცემა.
გაჟონილი დოკუმენტები შეიცავს ცნობებს უკრაინის კონტრშეტევის თარიღის, იარაღის მარაგების, პენტაგონის მიერ განხორციელებული მოსმენების შესახებ. ასევე, არის ჩანაწერები, რომელიც უკრაინის ომის შესახებ აშშ-ის პესიმისტურ შეხედულებასაც ასახავს.
სტატიაში აღწერილია, იარაღის მოყვარული მარტოხელა ახალგაზრდა, რომელიც ესაუბრებოდა ოცამდე ადამიანს OG-ის სახელით სოციალური მედიაპლატფორმა Discord-ზე, უზიარებდა მათ ინფორმაციებს იარაღისა და სამხედრო აღჭურვილობის შესახებ. გამოცემას მოჰყავს ინტერვიუ ეჭვმიტანილის მეგობართან, რომელიც ასევე ამ ჯგუფის წევრი იყო.
წყარო ამბობს, რომ ასობით სხვა ცნობები რეგულარულად ჩნდებოდა თვეების განმავლობაში. ეს იყო დაზვერვის ჩანაწერები, რომლებიც, როგორც OG-მ თქვა, მან სამსახურიდან, „სამხედრო ბაზიდან“ გამოიტანა.
ჯგუფის წევრების თქმით, მათ იციან OG-ის ნამდვილი სახელი და ის შტატი, რომელშიც ის ცხოვრობს, მაგრამ უარი განაცხადეს ამ ინფორმაციის გაზიარებაზე.
მათივე თქმით, ამ ადამიანმა იცოდა, რას აკეთებდა: „იგი ჭკვიანია, იცოდა, რას აკეთებდა, როცა ეს დოკუმენტები გამოაქვეყნა. ეს არავითარ შემთხვევაში არ არის შემთხვევითი გაჟონვა“.
ამ კვირის დასაწყისში, აშშ-ის თავდაცვის მდივანმა ლოიდ ოსტინმა ბრიფინგზე განაცხადა, რომ გამოძიება გაგრძელდება მანამ, სანამ არ დადგინდება გაჟონვის წყარო.
„ჩვენ გავაგრძელებთ გამოძიებას, სანამ არ ვიპოვით წყაროს და არ განვსაზღვრავთ გაჟონვის მოცულობას“, – თქვა მან.
