საქართველოს პარლამენტში პრეზიდენტის ვეტოს განხილვა იწყება. „ეროვნული ბანკის შესახებ“ ორგანულ კანონში განხორციელებული ცვლილებების პროექტზე სალომე ზურაბიშვილის ვეტოზე საფინანსო -საბიუჯეტო კომიტეტზე იმსჯელებენ.
კანონპროექტს პრეზიდენტმა ვეტო 23 თებერვალს დაადო.
სალომე ზურაბიშვილმა მიიჩნია, რომ „ეროვნული ბანკის შესახებ” კანონში ცვლილებები არც საჭირო და არც არგუმენტირებული იყო.
„ეროვნული ბანკის შესახებ” კანონში შეტანილი ცვლილებებით ეროვნულ ბანკში შემოდის პირველი ვიცე-პრეზიდენტის პოსტი. მან უნდა შეასრულოს ეროვნული ბანკის პრეზიდენტის მოვალეობა მანამ, სანამ საქართველოს პრეზიდენტი სებ-ის ახალ ხელმძღვანელს არ დანიშნავს.
ასევე, ამ თანამდებობის მქონე პირს, სებ-ის პრეზიდენტის არყოფნის პირობებში, პრეზიდენტის უფლებამოსილების შესრულება შეეძლება.
ახალ კანონს საერთაშორისო სავალუტო ფონდიც აკრიტიკებს.
გასულ კვირას მმართველმა პარტიამ პრეზიდენტი საქართველოს ეროვნული ბანკის საქმიანობის ხელის შეშლაში დაადანაშაულა. ასევე განაცხადა, რომ პრეზიდენტი მზად იყო, ეროვნული ბანკის საბჭოს ერთ-ერთ წევრად ლაშა ხუციშვილის კანდიდატურა წარედგინა, თუმცა, ყველა შეთანხმებული ვადა დაარღვია და კანდიდატი პარლამენტისთვის დღემდე არ წარუდგენია.
ქართული ოცნების პოლიტიკურმა საბჭომ განაცხადა, რომ პარლამენტი ეროვნული ბანკის შესახებ კანონზე პრეზიდენტის ვეტოს დაძლევს.
