აშშ-ს საბაჟო ტარიფების გამო შექმნილი გაურკვევლობის ფონზე, Goldman Sachs-მა ოქროს ფასის 2025 წლის პროგნოზი გაზარდა.
Goldman Sachs-ის ანალიტიკოსები 2025 წლის ბოლოსთვის უნცია ოქროს $3700-მდე გაძვირებას ვარაუდობენ, ცენტრალური ბანკების მხრიდან ძვირფას ლითონზე მოსალოდნელზე მაღალი მოთხოვნის გამო. აღსანიშნავია, რომ მათი წინა პროგნოზი ოქროს $3300-მდე გაძვირებას ითვალისწინებდა.
Goldman-ის ექსპერტების აზრით, 2026 წლის შუა პერიოდში ოქროს ფასმა შეიძლება მიაღწიოს $4000-ს უნციაზე.
მათი თქმით, თუ აშშ-ში რეცესია დაიწყება, ოქროზე მოთხოვნა კიდევ უფრო მეტი იქნება და 2025 წლის ბოლოსთვის მისი ფასი $3880-ს მიაღწევს, ამბობენ Goldman Sachs-ში.
ამასთანავე გასათვალისწინებელია ის გარემოებაც, რომ აშშ დოლარის გაიაფება ოქროს უფრო მიმზიდველს ხდის.
აშშ-ს პრეზიდენტმა დონალდ ტრამპმა განაცხადა, რომ ის “უახლოეს მომავალში” გამოაცხადებს გაზრდილ ტარიფებს სმარტფონების, ციპების და სხვა 20-მდე დასახელების ელექტროტექნიკის იმპორტზე. ის ამბობს, რომ სურს ჩიპები, ნახევარგამტარები და სხვა საქონელი შეერთებულ შტატებში დამზადდეს. პრეზიდენტმა ასევე პირობა დადო, რომ ძალიან მალე გამოაცხადებს გაზრდილ ტარიფებს ფარმაცევტულ პროდუქტებზე.
ცნობისთვის, შაბათ-კვირას, ამერიკულმა პრესამ გაავრცელა ინფორმაცია, რომ აშშ-ს მთავრობამ დროებით გააუქმა საპასუხო ტარიფები ელექტრონიკის ნაწილზე, მათ შორის კომპიუტერებზე, მობილურ ტელეფონებზე, მარშრუტიზატორებზე და ზოგიერთ მიკროჩიპზე.
დღევანდელ ვაჭრობაზე უნცია ოქროს ფასი $3220-ს შეადგენს.
